"Qazaqstan Temir joly" ulttyq kompanıasy qazaqstandyq "Jibek joly" kemesimen Berdánsk teńiz saýda porty arqyly Ýkraınadan astyq eksporttalatyny týraly aqparatqa baılanysty pikir bildirdi.

QTJ qazaqstandyq kememen astyq tasymaldanatynyn rastady.

Ulttyq kompanıa taratqan aqparatqa qaraǵanda, keme "KTZ Express Shipping" jaýapkershiligi shekteýli seriktestikke tıesili. 2021 jylǵy 26 qazanda "KTZ Express Shipping" JSHS reseılik Green Line LLC kompanıasymen berboýt-charter shartyn jasasqan. Shart merzimi 2022 jylǵy 30 qarashaǵa deıin jaramdy. Ol jerde kelisim-shart  áreket etý merzimi ishinde keme jumysyna eshqandaı sanksıalar qoldanylmaıtyndyǵyna kepildik berilgen. Iaǵnı "Jibek joly" kemesiniń qyzmeti sanksıa erejelerin buzbaıdy.

Kelisim-shart boıynsha jalǵa alýshy júktiń túri men ony tasymaldaý baǵyttary boıynsha keme ıesimen kelispeıdi. Al "Green-Line" jaýapkershiligi shekteýli seriktestigi 1999 jyldan beri astyq jáne munaı treıderi retindegi estonıalyq Mangelbert OU kompanıasymen Ýkraınadan Túrkıaǵa astyq tasymaldaý qyzmetin kórsetýge uzaq merzimdi kelisimshartqa otyrǵan.

Mangelbert OU basshysynyń sózinshe, 2022 jylǵy 28 maýsymda "Jibek joly" kemesi Berdánsk teńiz saýda portynda 7 myń tonnaǵa jýyq bıdaı tıep, porttan Túrkıanyń Qarasý porty baǵytyna shyqqan. Ári astyq ýkraındyq ekenin, al tasymaldaý ýkraınalyq taraptyń ótinishi boıynsha kelisilgen gýmanıtarlyq dáliz boıynsha júzege asyrylatynyn aıtady.

Buǵan deıin BAQ betterinde "Jibek joly" kemesimen Ýkraınadan Túrkıaǵa 7 myń tonna astyq zańsyz eksporttalǵany týraly aqparat taraǵan. Aqparatta "Jibek joly" (qazir Reseı týymen júzip kele jatqan) "KTZ Express Shipping" kompanıasyna tıesili qazaqstandyq keme ekeni aıtylady.