Ózbekstan konstıtýsıasyna ózgeris engizýdi talqylaý 15 shildege deıin sozyldy, dep jazady ózbekstandyq Podrobno.uz saıty.
"Zań palatasy búgingi plenarlyq otyrysta Konstıtýsıaǵa ózgeris engizýdi kózdeıtin zań jobasyn jalpyhalyqtyq talqylaýdy 15 shildege deıin sozdy" delingen habarlamada.
Bul – azamattardyń pikir bildirý belsendiliginiń joǵary bolýy men túsip jatqan usynystardyń kóptigimen baılanysty ekeni aıtyldy.
Saraptama nátıjesine saı, jalpyhalyqtyq talqylaýdyń alǵashqy kúnderi kúnine 700 usynys tússe, búginde kúnine túsip jatqan usynys sany 10 myńnan asqan.
Depýtattar Qaraqalpaqstan respýblıkasynyń egemendigi men kez kelgen ýaqytta referendým arqyly Ózbekstannan bólek shyǵýǵa kepil bolatyn konstıtýsıadaǵy 70-75 baptar ózgerissiz qalatynyn málim etti.
1 shilde kúni Ózbekstan quramyna kiretin Qaraqalpaqstan Respýblıkasynyń astanasy Nókis qalasynda resmı Tashkenttiń ózgertý arqyly Konstıtýsıadan avtonomıanyń táýelsizdik jarıalaý quqyǵyn joıý josparyna qarsy jappaı narazylyq bastalyp, bılik azamattardy kúshpen taratqan. 2 shildede prezıdent Shavkat Mırzıeev Qaraqalpaqstannyń statýsyna baılanysty ózgertýlerden bas tartyp, 3 shildede avtonomıa aýmaǵynda tótenshe jaǵdaı rejımi engizildi.
Ózbekstannyń resmı bıligi narazy azamattardy "qylmysker" dep atap, áreketterin "zańsyz" dep otyr. Qaraqalpaqstandaǵy jaǵdaı týraly jetip jatqan aqparat mardymsyz. Áleýmettik jelilerde mılısıa adamdardy sabap, qan bolǵan kósheni jýýyp jatqan vıdeolar taraýda. Ózbekstan prokýratýrasy azamattar men mılısıa arasyndaǵy qaqtyǵystan 18 adam qaza taýyp, 94 adam aýrýhanada jatqanyn, 243 adam jaralanǵanyn habarlady. Jaralylar arasynda 38 quqyqqorǵaý organy qyzmetkeri bar.
Ulttyq gvadıa baspasóz qyzmetiniń jetekshisi Davpon Jýmanazarov 1-2 shildede demonstrasıa ornynda 516 adam ustalǵanyn, komendanttyq saǵat kezinde kóshede júrgen 110 adam qamalǵanyn málim etti.
Aımaqta baılanys nashar, ınternet durys istemeıdi.
Pikir qaldyrý