Almaty qalasyndaǵy "Altyn orda" bazarynyń tóńiregindegi daý áli basylmady. Bul týraly qoǵam belsendileri málimdedi. Olardyń aıtýynsha, sáýir aıynda bazardyń basshylyǵy aýysqanymen, saýda ornynda zań buzýshylyqtar toqtamaǵan.
– Kórshi elderden kelgen toptar bazardy ózdiginshe bólip alyp, bıligin júrgizedi eken. Ondaǵy únemi jazasyz qalatyn urlyq-qarlyq pen qoldan jasalǵan qymbatshylyqqa osy toptardyń qatysy bar, – deıdi elordada jıyn ótkizgen zańger Dáýren Ǵabdýl.
Saýdagerler tarapynan da kóptegen shaǵym túsip jatyr. Al qoǵam belsendileri "Altyn ordanyń" qazirgi qojaıyny tıisti jumystardy júrgize almaı jatqanyn aıtyp otyr.
– Kompanıada 95 paıyz úlesi bar astanadaǵy ekonomıkalyq tergeý departamentiniń burynǵy qyzmetkeri Hamzınniń quryltaıshylar quramyna qalaı kirgeni belgisiz. Bazarda áli zańsyz jaıttar oryn alýda. Bul máselelerge bazardyń qazirgi ıeleri jaýap berip, tártip ornatýǵa mindetti, – deıdi Dáýren Ǵabdýl.
Onyń aıtýynsha, "Altyn orda" bazary – Almaty qalasy men oblysynyń turǵyndaryn azyq-túlikpen qamtamasyz etip otyrǵan úlken bazar. Sondyqtan "Altyn ordanyń" taǵdyry ár azamatty alańdatýy keregin aıtady.
– Bul – startegıalyq nysan. Eger ol jerdiń jumysynda aqaý bolsa, árqaısymyzdyń ústelimizdegi nanymyzǵa, jep otyrǵan etimizge deıin áser etedi. Osydan 3 aı buryn kelgen jańa qojaıyn bazardyń ortadaǵy adamdardyń qatysýymen kóteriletin baǵalarǵa qatysty bylyqtaryn joıýǵa ýáde etken. "Altyn ordanyń" burynǵy quryltaıshylarynyń ústinen 2017 jyly bazardy reıderlik jolmen tartyp aldy degen aryz tústi, – dedi zańger.
Zańger Dáýren Ǵabdýl qazir saýda orynnyń eks-basshylary bıznes oshaǵyn qaıtaryp alýǵa tyrysyp jatqanyn aıtady. Búginde bylyqqa ábden batqan bazardyń aldaǵy jaı-kúıi qalaı bolatyny belgisiz.
Pikir qaldyrý