Bas prokýratýra bóliminiń prokýrory Abror Mamatovtyń aıtýynsha, tergeý men izdeý operasıalary asa qupıa jaǵdaıda ótedi. Tergeýdi Memlekettik qaýipsizdik qyzmeti, Bas prokýratýra, İİM, Ulttyq gravdıa ókilderinen turatyn arnaıy top júrgizedi.

Atalǵan aıyp qansha adamǵa taǵylǵany ázirge belgisiz. Ulttyq gvadıa baspasóz qyzmetiniń jetekshisi Davpon Jýmanazarov buǵan deıin 1-2 shildede demonstrasıa ornynda 516 adam ustalǵanyn, komendanttyq saǵat kezinde kóshede júrgen 110 adam qamalǵanyn málim etken. Ózbekstan prokýratýrasy Nókistegi azamattar men mılısıa arasyndaǵy qaqtyǵystan 18 adam qaza taýyp, 94 adam aýrýhanada jatqanyn, 243 adam jaralanǵanyn habarlaǵan. Jaralylar arasynda 38 quqyqqorǵaý organy qyzmetkeri bar.

1 shilde kúni Ózbekstan quramyna kiretin Qaraqalpaqstan Respýblıkasynyń astanasy Nókis qalasynda resmı Tashkenttiń ózgertý arqyly Konstıtýsıadan avtonomıanyń táýelsizdik jarıalaý quqyǵyn joıý josparyna qarsy jappaı narazylyq bastalyp, bılik azamattardy kúshpen taratqan. 2 shildede prezıdent Shavkat Mırzıeev Qaraqalpaqstannyń statýsyna baılanysty ózgertýlerden bas tartyp, 3 shildede avtonomıa aýmaǵynda tótenshe jaǵdaı rejımi engizildi.

Ózbekstannyń resmı bıligi narazy azamattardy "qylmysker" dep atap, áreketterin "zańsyz" dep otyr. Qaraqalpaqstandaǵy jaǵdaı týraly jetip jatqan aqparat mardymsyz. Áleýmettik jelilerde mılısıa adamdardy sabap, qan bolǵan kósheni jýýyp jatqan vıdeolar taraýda.