Reseı prezıdentiniń baspasóz hatshysy Dmıtrıı Peskov Kreml Qazaqstan prezıdenti Q.Toqaevtyń Kaspıı qubyr jelisi konsorsıýmy jumysy toqtaǵannan keıin, eksporttyń balama marshrýtyn damytýdy tapsyrýynan saıası astar kórmeıtinin málim etti. Bul týraly ol kommersant.ru basylymyna aıtty.

5 shildede Reseıdiń Novorossıısk soty ekologıalyq buzýshylyqtarǵa baılanysty Qazaqstan munaıyn eksporttaıtyn negizgi baǵyt KQK-niń jumysyn 1 aıǵa toqtatý týraly sheshim qabyldaǵan.

Osyǵan oraı búgin Qazaqstan prezıdenti kólik-tranzıt áleýetin damytý jónindegi keńeste munaı tasymaldaý jelilerin ártaraptandyrý máselesiniń mańyzyna toqtalyp, QazMunaıGaz" ulttyq kompanıasyna ony júzege asyrý máselesin qarastyrýdy tapsyrǵan.

– Transkaspıı baǵdary basym baǵyt sanalady. "QazMunaıGazǵa" ony júzege asyrýdyń ońtaıly nusqasyn, sonyń ishinde Teńiz jobasynyń ınvestorlaryn tartý múmkindigin pysyqtaýdy tapsyramyn. Úkimet "Samuryq-Qazynamen" birlesip, Atyraý – Keńqıaq jáne Keńqıaq – Qumkól munaı qubyrlarynyń qýatyn arttyrý jóninde sharalar qabyldaýy qajet, – dedi Toqaev jıynda.