Bıyl bakalavrıatqa túsý úshin 73 myńnan astam grant bólinip otyr. Granttardyń basym bóligi "Injenerlik, óńdeý, qurylys salalary" bilim berý baǵdarlama toptaryna bólingen, olardyń sany 17 794 grantty quraıdy. Al "Pedagogıkalyq ǵylymdarǵa" – 10 810 grant, "Aqparattyq-kommýnıkasıalyq tehnologıalar" salasyna – 9 103 grant, "Jaratylystaný ǵylymdary, matematıka jáne statısıka" baǵytyna – 6 288 grant tıesili. Osylaısha, tehnıkalyq baǵyttar boıynsha memlekettik tapsyrystyń úlesi 60%-ǵa deıin ulǵaıǵan.
UBT qorytyndysy boıynsha keminde 65 bal jınaǵan talapkerler ulttyq joǵary oqý oryndaryna, keminde 50 balmen basqa joǵary oqý oryndaryna túse alady. Bul rette "Pedagogıkalyq ǵylymdar" jáne "Quqyq" bilim berý salalary boıynsha shekti bal keminde 75 bal, "Densaýlyq saqtaý" − keminde 70 bal, "Aýyl sharýashylyǵy jáne bıoresýrstar", "Veterınarıa" – keminde 60 baldy quraıdy.
Oqýǵa túsýshiler 16 mamyr men 5 shilde aralyǵynda ótken UBT-nyń eki nátıjesiniń bireýin konkýrsqa usyna alady.
Memlekettik bilim berý granttaryn taǵaıyndaý konkýrsyna qatysýǵa qujattardy elektrondy túrde tapsyrý úshin talapkerlerge tómendegi qujattar qajet:
- jeke kýálik;
- UBT sertıfıkaty;
- 3h4 kólemindegi foto;
- orta bilim týraly atestat (tehnıkalyq jáne kásiptik bilim berý (TjKB) uıymdarynyń túlekteri úshin dıplom);
- № 075/ý nysanyndaǵy medısınalyq anyqtama jáne № 063/ý nysanyndaǵy profılaktıkalyq ekpeler kartasy;
- er jigitter úshin áskerı tirkelý kýáligi;
- jeńildetilgen sanat boıynsha konkýrsqa qatysý úshin rastaıtyn qujattar.
Eger talapker "Altyn belgi" ıegeri nemese otansúıgishtik jáne belsendi azamattyq ustanymy úshin erekshelik belgisimen marapattalǵan bolsa, onda ol basqa úmitkerlermen baldary teń bolǵan jaǵdaıda basym quqyqqa ıe bolady. Olımpıadalar men sporttyq jarystardyń jeńimpazdary úshin de osyndaı basymdylyq qarastyrylǵan.
Bıyl alǵash ret halyq tyǵyz ornalasqan jáne batys óńirleriniń jastarynyń jetekshi joǵary oqý oryndarynda oqýǵa arnalǵan maqsatty bilim berý granty baǵdarlamasy iske qosylyp otyr. Bul Atyraý jáne Mańǵystaý oblystarynyń 10 myń talapkerine joǵary oqý oryndarynda bilim alý úshin maqsatty granttar alýǵa múmkindik beredi.
Sonymen qatar bıyl halyqtyń áleýmettik osal toptaryna bólinetin granttar sany kóbeıtilgen. Kámeletke tolmaǵan tórt jáne odan kóp bala tárbıelep otyrǵan otbasylardaǵy balalar úshin granttardyń jalpy sanynyń 5%-y, keminde úsh jyl tolyq emes otbasy mártebesi bar otbasylardan shyqqan balalarǵa – 1%, İ, İİ toptaǵy múgedek balalardy tárbıelep otyrǵan otbasylardan shyqqan túlekterge bilim berý granttarynyń 1%-y kózdelgen. Jetim balalar jáne ata-anasynyń qamqorlyǵynsyz qalǵan balalar men I, II toptaǵy múgedekter, bala kezinen múgedekter, múgedek balalar arasynan shyqqan azamattar úshin kvota granttar sanynyń 1%-yn quraıdy. Jyl saıyn Qazaqstan Respýblıkasynyń azamaty bolyp tabylmaıtyn ulty qazaq adamdarǵa (qandastarǵa) granttardyń 4%-y beriledi.
Bilim berý granttaryn taǵaıyndaý konkýrsyna qatysýǵa qujat qabyldaý 20 shildege deıin jalǵasady.
Pikir qaldyrý