Sot Kentaý qalasynyń burynǵy ákimin para alǵany úshin kináli dep tanyp, 10 jylǵa bas bostandyǵynan aıyrdy, dep jazady Tengrinews.kz saıty.

Almatynyń qylmystyq ister jónindegi mamandandyrylǵan aýdanaralyq sotynda Kentaý qalasynyń eks-ákimi Dáýren Mahajanovqa qatysty úkim shyqty. Ol qylmystyq kodekstiń 366-baby 4-bóligi "Asa iri mólsherde para alý" boıynsha qylmys jasaǵany úshin kináli dep tanyldy.

"Sot Dáýren Sábıtuly Mahajanovty 24-baptyń 7-bóligi ("Qylmysqa daıyndalý jáne qylmys jasaýǵa oqtalý") jáne QR QK-nyń 366-baby 4-bóligi boıynsha qylmystyq quqyq buzýshylyq jasaǵany úshin kináli dep tanýǵa úkim shyǵardy.  Memlekettik qyzmette, sotta, Ulttyq bankte, vedomstvolarda, Qarjy naryǵy men qarjy uıymdaryn retteý jáne baqylaý organdarynda, memlekettik uıymda jáne kvazımemlekettik sektor sýbektilerinde qyzmet atqarýǵa ómir boıyna tyıym salý jáne on jyl merzimge bas bostandyǵynan aıyrý túrindegi jaza taǵaıyndalsyn. Jazany óteý orny qylmystyq-atqarý júıesiniń barynsha qaýipsiz mekemeleri bolyp taǵaıyndalady. Merzim sot úkimi zańdy kúshine engen sátten bastap esepteledi. 2022 jyldyń 24 aqpanynan bastap qamaýǵa alý merzimi jaza merzimine eseptelsin", - degen úkim shyǵardy Almaty qalasy qylmystyq ister jónindegi mamandandyrylǵan aýdanaralyq sotynyń sýdıasy Mártpek Kákimjanov.

İis boıynsha basqa aıyptalýshylar – Lavrentıı Bobryshev pen Baýyrjan Túmebaev 368-baptyń 1-bóligi "Para alýdaǵy medıasıa" boıynsha kináli dep tanyldy. Bobryshev bir jylǵa bas bostandyǵynan aıyryldy. Jazasyn eń tómengi qaýipsizdik mekemesinde óteıdi. Baýyrjan Túmebaev bir jyl alty aıǵa bas bostandyǵynan aıyrylǵan.

Sottalýshylardan prosesýaldyq shyǵyn retinde 171 000 teńge óndirildi. Sondaı-aq, Mahajanovtan jábirlenýshilerge ótemaqy qoryna 30 AEK (shamamen 91 myń teńge) kóleminde tólemaqy óndirildi. Bobryshev pen Túmebaevtyń árqaısynan 15 AEK (shamamen 45 000 teńge) kóleminde óndirildi.

Sot úkimine 15 kún ishinde shaǵym jasaýǵa bolatyny aıtyldy.