Prezıdent Q.Toqaev ınflásıanyń sharyqtaýy búginde eń kúrdeli másele bolyp otyrǵanyn, qymbatshylyq  deńgeıi 19,2 paıyzǵa, azyq-túliktiń keıbir túri birden 80 paıyzǵa qymbattaǵanyn málim etti.

– Úkimettiń baǵany turaqtandyrýǵa baǵyttalǵan sharalary tıimsiz bolyp shyqty. Úkimet ınflásıany eski ádis-tásilmen toqtatqysy keledi. Onyń ózinde búdjetten qosymsha qarajat bólip, baǵany jasandy túrde ǵana rettep otyr. Iaǵnı, qymbatshylyqtyń sebebimen emes, saldarymen kúres júrip jatyr. Al, shyn máninde, kerisinshe bolýy kerek. Úkimet bar jaýapkershilikti óńirlerge artyp qoıdy. Olar ákimshilik resýrsty paıdalanyp, dúkenderdi aralap júr, basqa tásilder jáne jańa ıdeıalar joq. Mundaı jumys eshqashan tıimdi bolǵan emes. Bir sózben aıtqanda, naryq zańdylyǵyna saı keletin jańa ustanym joq, – dedi Toqaev úkimettiń birlesken otyrysynda.

Prezıdent 2 jyl buryn tapsyrǵan kóterme-taratý ortalyqtary jelisi bar ulttyq taýar ótkizý júıesin iske qosý týraly tapsyrmasyn úkimet áli oryndamaǵanyn atap ótip, qazan aıyna deıin atalǵan salada atqarylǵan jumys týraly esep berýdi tapsyrdy.