Almatynyń jer bederine baılanysty nóser jaýyn kezinde qalany sý basyp jatady. Tekserý barysynda qalada turaqty sý basatyn 102 ýchaske anyqtaldy. Bıyl naýryz aıynda jaýyn-shashynnyń aılyq mólsheri 76 mm norma kezinde 166,3 mm, maýsym aıynda 106 mm norma kezinde 141,6 mm qurady. Bul týraly Almaty ákimi Erbolat Dosaev Ortalyq komýnıkasıalar qyzmetinde ótken brıfıńte habarlady.

«2022 jyldyń sońyna deıin sý basatyn 56 ýchaske joıylyp, 12 kolektor qalpyna keltiriledi, 75 km aryq jelisi jańǵyrtylady. Júıeli shara retinde nóser kanalızasıasy (kolektor, kanaldar, sý toǵandary) biryńǵaı operator - qala ákimdigine tıesili «Eco Almaty» jaýapkershiligi shekteýli seriktestigine beriledi. 2023-2024 jyldary 201 km aryq jelisin jańǵyrtý aıaqtalady, 100 km jańa aryq jelisi salynady, turaqty sý basatyn 46 ýchaske joıylady. Turaqty sý basýdy joıý úshin aǵymdaǵy jyly jergilikti búdjet rezervinen 5,3 mlrd teńge bólindi», -  dedi spıker.