Memleket basshysynyń tapsyrmasy boıynsha Almaty qalasy máslıhatynyń 2022 jylǵy 20 maýsymdaǵy sheshimimen Almaty qalasynda qurylys júrgizý reglamentine tolyqtyrýlar engizildi. Qala basshysy Erbolat Dosaevtyń aıtýynsha, Ál-Farabı dańǵylynyń ońtústigine qaraı bıiktigi 15 metrden aspaıtyn densaýlyq saqtaý jáne bilim berý obektilerin salý parametrleri aıqyndaldy, sondaı-aq aýyl sharýashylyǵy maqsatyndaǵy jer ýchaskelerin bólýge jáne taý bókterlerine, sondaı-aq 15 gradýs jáne odan da tik quzdy alańdarǵa shaǵyn qabatty ǵımarattar salýǵa jol berilmeıdi.

«Abaıdyń ońtústigi men Ál-Farabıdiń soltústigine qaraı turǵyn úı ǵımarattarynyń qabat sany parapettiń joǵarǵy jaǵyna deıin eń joǵary bıiktigin 35 metrden asyrmaı, 9 qabatqa deıin shekteldi jáne jaılylyǵy III klastan tómen emes turǵyn úı ǵımarattarynyń parametrlerin qoldaný belgilendi. Sonymen qatar, biz osy jyldyń 1 tamyzynan bastap qalanyń Qala qurylysy keńesiniń qyzmetin jańa formatta qaıta bastaýdy josparlap otyrmyz. Onda iske asyrýǵa usynylatyn qala qurylysy jáne sáýlet jobalary boıynsha sheshimder táýelsiz sarapshylardy tarta otyryp, ashyq talqylaý arqyly qabyldanatyn bolady», - dedi Almaty ákimi Ortalyq komýnıkasıalar qyzmetinde ótken brıfıńte.