AQSH Ádilet departamentiniń ókilderi qylmystyq aktıvterdi izdeýge jáne AQSH-tan Qazaqstanǵa qaıtarýǵa qoldaý kórsetýge daıyn ekenin málemdedi. Bul týraly Bas prokýrordyń birinshi orynbasary Tımýr Táshimbaev bastaǵan Qazaqstan Respýblıkasy Bas prokýratýrasynyń delegasıasynyń Amerıka Qurama Shtattaryna jasaǵan jumys sapary barysynda belgili boldy.

Bas prokýratýra baspasóz qyzmetiniń habarlaýynsha, Qazaqstan delegasıasy sapar barysynda AQSH Ádilet departamentiniń basshylyǵymen, Federeldyq tergeý búrosy jáne Dúnıejúzilik bank ókilderimen birqatar kezdesýler ótkizgen.

"Taraptar naqty qylmystyq ister boıynsha yntymaqtastyqty nyǵaıtý, suraý salýlardy elektrondyq formatta berý, kıberqylmyspen kúres salasynda tájirıbe almasý, sottalǵandardy ustap berý jáne berý týraly sharttar jasasý máselelerin talqylady. AQSH Ádilet departamentiniń ókilderi qylmystyq aktıvterdi izdeýge jáne AQSH-tan Qazaqstanǵa qaıtarýǵa qoldaý kórsetýge daıyn ekenderine sendirdi. Taraptar birlesken kúsh-jigermen ǵana transulttyq uıymdasqan qylmysqa jáne qylmystyq kiristerdi jylystatýǵa qarsy tıimdi kúres júrgizýge bolady degen ózara pikirge keldi.

Budan bólek, Qazaqstan delegasıasy Dúnıejúzilik Banktiń «StAR Initiative» (Urlanǵan aktıvterdi qaıtarý bastamasy) jobasynyń ókilderimen kezdesti. Dúnıejúzilik bankpen Qazaqstannyń shetelge, onyń ishinde ofshorlyq ıýrısdıksıaǵa shyǵarylǵan qylmystyq jolmen tabylǵan aktıvterdi qaıtarý boıynsha kúsh-jigerin qoldaý jáne yntymaqtastyqtyń kórsetilgen baǵyty boıynsha prokýrorlar men tergeýshiler úshin trenıńter ótkizý máseleleri talqylandy. Bank ókilderi qazaqstandyq taraptyń bul bastamalaryn qoldady" delingen aqparattyq habarlamada.

Buǵan deıin Sybaılas jemqorlyqqa qarsy is-qımyl agenttigi Eýroodaq Qazaqstannan shyǵarylǵan aktıvterdi qaıtarýǵa kómektesýge daıyn ekenin málim etken.