Qarjy mınıstrligi "Búdjet kodeksine" ózgeris engizip,  90-shy jyldary memleket tarapynan kásip ashýǵa berilgen bereshekterdi keshirý máselesin qarastyryp jatyr. Iaǵnı, 30 jyldan astam nesıesin tólemeı júrgen kásiporyn ıeleri tabylmasa, onda onyń qaryzy joıylady, dep habarlady 31 arna.

Bul ózgeris zańdy tulǵalarǵa ǵana baılanysty kúshine enbek. Mundaı nesıelerdiń mólsheri qazir 120 mıllıard teńgeni quraıdy. Bıliktegiler kezinde jergilikti ákimdikter men úkimet qaryz bergen nesıe ıelerin tabý ońaı emes ekenin aıtfly. Sebebi 90-shy jyldary kóp kásiporyndardyń "bıznesti sáıkestendirý nómirleri" joq bolǵan. 

Qarjy mınıstrligi jyl saıyn esep bergende bul bereshekterdiń statısıkaǵa kedergi keltiretinin atap ótken. Sol sebepten de zańǵa osyndaı ózgeris engizbekshi. Endi "Búdjettik kodekste" "Óndirip alýǵa úmitsiz bereshek" degen uǵym paıda bolmaq. 

"Úkimet jyl saıyn esep bergen kezde osyndaı taptaǵy adamdardyń bershegi tizimde turady. Bundaı derekterdiń bizge ne qajeti bar?" deıdi Qarjy mınıstrligi búdjettik kredıtteý departamenti dırektorynyń orynbasary Darhan Bınıazov.

Onyń aıtýynsha, qaıtarylmaǵan búdjettik kredıtterdiń ıesin tabý jumysy ádilet mınıstrligi men azamattarǵa arnalǵan úkimet korporasıasymen birigip júzege asyrylyp jatyr. 

Alaıda bundaı usynysqa ekonomıser qarsylyq tanytýda. 

"Ómirde túrli jaıttar bolady. Árıne, nesıeni keshirý kerek. Biraq zańdy tulǵalardyń emes, jetim-jesirler, kóp balaly analar men aýyldaǵy jaǵdaıy kelmegenderge qarastyrǵan jón. Osy másele boıynsha úlken tekseris júrgizý kerek. Sebebi qarjyny búdjet emes, bank berýi kerek" dedi ekonomıs Beısenbek Zıabekov.

Ol 90-shy jyldary bılik halyqqa zeınetaqyny ýaqytynda tóleı almaı otyryp, qomaqty qarjyny nesıe retinde berilgenine tań qalatynyn jetkizdi. Osyǵan baılanysty bankter men qarjy salasyndaǵylar ústinen tekseris júrgizý kerek ekenin de qosa ketti. 

"Búdjettik kodekske" engiziletin ózgerister qazir qoǵam talqylaýyna shyǵarylǵan. Eki aıdan keıin qujat májiliske usynylmaq.