Ǵylym jáne joǵary bilim mınıstrligi áleýmettik jelilerdegi taralǵan joǵary oqý oryndaryna arnalǵan jeńildetilgen turǵyn úı baǵdarlamasy týraly aqparat jalǵan ekendigin habarlady.

19 shilde kúni áleýmettik jelilerde https://mongov.kz saıtyna silteme jasaı otyryp, JOO qyzmetkerleri arasynda turǵyn úıge qajetti tizim jasaý úshin saýalnama toltyrý suralǵan habarlandyrý taraǵan. Mınıstrlik atalǵan saıttaǵy aqparat alaıaqtyq áreket ekenin, olardyń negizgi maqsaty – joǵary oqý oryndarynyń qyzmetkerleri týraly jeke derekterdi jınaý ekenin málim etti.

"Ǵylym jáne joǵary bilim mınıstrligi jalǵan aqparat taratýdan bas tartýǵa shaqyrady jáne Mınıstrliktiń bastamalary týraly habarlaý qajet bolǵan jaǵdaıda elektrondyq qujat aınalymy júıesine engizilgen resmı aqparat arnalary paıdalanylatynyn málimdeıdi. Atalǵan oqıǵa boıynsha aqparat quqyq qorǵaý organdaryna berildi" delingen mınıstrlik málimdemesinde.