Almaty qalasy máslıhatynyń kezekten tys XXIII sesıa ótip, máslıhat quramynda ózgerister boldy.

Sesıa barysynda Almaty qalasy aýmaqtyq saılaý komısıasynyń qaýlysy, "AMANAT" pen "Qazaqstan Halyq partıasy" partıalary fılıaldarynyń sheshimderi negizinde jáne berilgen ótinishterge sáıkes 11 depýtatty almastyrý (rotasıa) júrgizildi. Sondaı-aq partıalardyń birqatar músheleri partıadan shyǵaryldy. Olardyń qatarynda qańtar oqıǵasy tergeýi aıasynda sáýir aıynda ustalyp, áli kúnge deıin qamaýda otyrǵan belgili kásipker Qaırat Qudaıbergen de bar. Ol qalalyq máslıhat quramynan ári "AMANAT" partıasynan shyǵarylǵan.

Qaırat Qudaıbergen qańtar oqıǵasy kezinde 24 adamdy urlaǵan dep aıyptalyp otyrǵan "Dıkıı Arman" esimimen belgili krımınal avtorıtet Arman Jumageldıevtiń janynda júrgen. Qazirgi ýaqytta eki azamat ta tergelip jatyr.