Ońtústik Koreıaǵa jumysqa turǵyzamyn dep almatylyqtardy 2 mln teńgege aldap ketken er adam ustaldy, – dep habarlady ishki ister mınıstrliginiń ınternet-resýrsy.

27 jastaǵy S.esimdi azamattyń is-áreketi eki jáne odan da kóp adamǵa qatysty aldaý jáne senimge qıanat jasaý arqyly bótenniń múlkin birneshe ret urlaý retinde kvalıfıkasıalanǵan.

– Qazirgi tańda sotqa deıingi tergeýdiń biryńǵaı tizilimine alaıaqtyq boıynsha 2 derek tirkeldi. Olar bir óndiriske biriktirilgen. Kúdikti ınternet-resýrs arqyly adamdardy aldaǵan. Ol Ońtústik Koreıaǵa jumysqa ornalasýǵa jáne jumys vızasyn alýǵa kómektesý týraly jalǵan habarlandyrýlar ornalastyrǵan. Aqshany alǵannan keıin er adam jasyrynyp qalǵan. QR QK-niń 190-baby 3-bóliginiń 3-tarmaǵy, QR QK-niń 190-baby 3-bóliginiń 4-tarmaǵyna (alaıaqtyq) sáıkes qylmys jasady degen kúdik boıynsha jedel-izdestirý is-sharalaryn júrgizý barysynda S.esimdi azamat ustaldy. Ol QR QPK-niń 128-babyna sáıkes qamaýǵa alyndy, – dedi Jetisý aýdandyq Polısıa basqarmasynyń bastyǵy Darhan Musanov.

Polısıa tergeý qajettigi úshin S. esimdi azamattyń qylmystyq áreketterinen zardap shekken azamattar bolsa, tómendegi telefondar arqyly habarlasýlaryn suraıdy:

+7-778-879-78-88; + 7-702-401-11-10.