«Tarıhymyzda alǵash ret kedeılik deńgeıi bir razrádty sıfrǵa deıin tómendedi», - dep málimdedi Álemdik bank ókilderi. Bul týraly «Qamshy» portaly bbc.com-ǵa silteme bere otyryp habarlaıdy. 2012 jyly 12,8 paıyzdy quraǵan kórsetkish bıylǵy jyly birden 9,6 paıyzǵa tómendepti.

Saharanyń ońtústigindegi halyqtyń kedeılik kórsetkishi bıylǵy boljam boıynsha 2012 jylǵy 42,6-dan 35,2 paıyzǵa tómendemek. «Qalaı bolǵanda da bul álemdik kedeılik kórsetkishiniń teń jartysyn qurap tur» - dep alańdaýshylyq bildirdi Álemdik bank Prezıdenti Djım En Kım.

«Dese de, biz – kedeılikpen múlde qosh aıtysýǵa múmkindigi bar adamzat tarıhyndaǵy alǵashqy býyn ókilderimiz», - dedi, qýanyshymen bólisken Prezıdent myrza.

Atalmysh tendensıanyń damýshy memleketterdegi bilim, densaýlyq saqtaý jáne áleýmettik qorǵaý syndy salalarǵa salynǵan ınvestısıalardyń qarqyndy ósimimen túsindiriletinin aıtty bank ókilderi. 

Degenmen, Kım myrza: «Álemdik ekonomıka ósiminiń toqtap turǵany, qarjylyq naryqtyń turaqsyzdyǵy, túrli qaqtyǵystar, jastar arasyndaǵy jumyssyzdyq jáne klımattyń únemi ózgeriske ushyraý syndy máseleler atalmysh progrestiń jalǵasýyna keri áserin týdyrýy múmkin», - dep eskertti.

Biraq, biraz memleketterde daý-damaılardyń saldarynan nemese shıkizat taýarlarynyń shamadan tys eksportyna baılanysty kedeıliktiń beleń alyp ketýi zańdy qubylys ekenin aıtyp ótti bank ókilderi.