Almaty qalasy men Soltústik Qazaqstan oblysynda 200 myńnan astam oqýshy 2022 jylǵy 1 qyrkúıekten bastap bes kúndik oqý aptasyna kóshedi. Sondaı-aq osy óńirlerdegi 25 myńnan astam muǵalim úshin senbi demalys kúnge aınalady. 5 kúndik oqýǵa mektepterdiń 100%-y kóshedi. Bul týraly Oqý-aǵartý mınıstrliginde ótken jıynda Almaty jáne SQO bilim basqarmalarynyń basshylary baıandady.

Mınıstrlik málimetinshe, Almatyda buryn senbi kúnderi oqyǵan 166 myń bala men jumys istegen 13 myń muǵalim, 124 mektep endi bes kúndik oqý aptasyna kóshedi.

SQO-da da bes kúndik oqýǵa 74 myńǵa jýyq bala oqıtyn 470-ten astam mektep 100 paıyz kóshedi. Bir aýysymda 23 myń oqýshysy bar 254 mektep oqıdy.

Osylaısha, muǵalimderge de, oqýshylarǵa da júkteme azaıady.

Mınıstrlik bul oqý jylyn 31 mamyrda aıaqtaý jáne oqý júktemesin azaıtý týraly sheshimniń aıasynda múmkin bolǵanyn atap ótti.

– Prezıdent pedagog mártebesin kóterýge erekshe kóńil bólip otyr. Qasym-Jomart Kemeluly Toqaevtyń jeke qoldaýynyń arqasynda "Pedagog mártebesi týraly" zań qabyldanyp, muǵalimderdiń jalaqysy kóterilip, júktemesi qysqartyldy. Zańǵa táýeldi aktiler qabyldanyp, ákimdikter burynǵydaı muǵalimderdi mindetinen tys artyq jumystarǵa tartpaıdy. Prezıdent tapsyrmalary boıynsha atqarylatyn jumystar aıasynda aldaǵy ýaqytta senbi mektep muǵalimderi úshin resmı demalys kúnine aınalady, bul áriptesterimizge sabaqqa daıyndalyp, ýaqytty otbasymen birge ótkizýge múmkindik beredi. Munyń balalarǵa berer artyqshylyqtary bar, endi olardyń da kóbirek bos ýaqyty bolady. Biz bul máseleni erekshe baqylaýǵa aldyq, – dedi mınıstr kezdesýde.