QR İİM Tergeý departamentiniń bastyǵy Sanjar Ádilov Qańtar oqıǵalary boıynsha qozǵalǵan qylmystyq isterdiń qanshasy aıaqtalǵanyn aıtty.

Sanjar Ádilovtyń sózinshe, osy ýaqytqa deıin 4 642 qylmystyq is qozǵalǵan.

"971 istiń óndirisi aıaqtaldy, onyń ishinde 609 aıyptalýshyǵa qatysty is sottarǵa joldandy.  Sot qaraýlarynyń nátıjeleri boıynsha 539 aıyptalýshyǵa úkim shyqty, olardyń 425-i bas bostandyǵyn shekteýge jáne tek 104-i ǵana aýyr jáne asa aýyr qylmystar jasaǵany úshin bas bostandyǵynan aıyrýǵa sottaldy" dedi Sanjar Ádilov ortalyq komýnıkasıalar qyzmetinde ótken brıfıńte.

Spıkerdiń dereginshe, qazir polısıa tergeýshileriniń óndirisinde 276 is qaralyp jatyr. Onyń ishinde qarýdy zańsyz saqtaý boıynsha 50, kisi óltirý – 33, bılikti asyra paıdalaný – 40, urlyq – 16, buzaqylyq – 4 jáne taǵy basqa qylmystar bar.