Vengrıada sınoptıkterdiń eldegi memlekettik deńgeıde atap ótiletin Áýlıe Ishtvan kúnine arnalǵan boljamy sáıkes kelmeı qalyp, meteorologıalyq qyzmet basshysy jumysynan alynǵan. Bul týraly VVS habarlady.

Áýlıe Ishtvan kúni ótken senbide el astanasy Býdapeshtte merekelenýi kerek bolǵan. Áýlıe Ishtvan bılikti ortalyqtandyrǵan, Vengrıany hrıstıan memleketine aınaldyrǵan jáne eldiń negizin qalaýshy bolyp sanalady.

Merekeni toılaý barysynda uıymdastyrýshylar Eýropadaǵy eń úlken ot shashý jasaýdy josparlap, 40 myń feıerverk satyp alǵan. Feıerverkter  Dýnaı ózeniniń boıyn jaǵalaı 240 jerge ornatylady. Erekshe kórinisti 2 mıllıonǵa jýyq adam tamashalaıdy dep josparlaǵan.

Aýqymdy is-sharaǵa jeti saǵat qalǵanda meteorlar úkimetke el astanasyna nóser kele jatqanyn eskertip, jedel habarlama joldaıdy. El úkimeti sınoptıkterdiń sózinen keıin is-sharany amalsyz keıinge qaldyrady.

Alaıda sınoptıkter boljaǵandaı, el astanasyna nóser turmaq, bir tamshy da jaýmaıdy. Aýa raıyn boljaý qyzmetindegiler merekeniń shyrqy buzylǵany úshin keshirim surap, aýa raıynyń yqtımaldyǵy asa tómen senarıi bolǵanyn, mundaı jaǵdaı kezdesip turatynyn jetkizgenimen, Inovasıalar jáne tehnologıalar mınıstri Laslo Palkovıch vedomstvoǵa qarasty meteoqyzmet bastyǵy men onyń orynbasaryn qyzmetinen aldy.

Buny vengrler túrlishe qabyldap jatyr. Keıbireýler Úkimet meteorologtardy jumystan shyǵarǵanyn quptamasa, basqalary sınoptıkterdiń qateligine ashýlanyp, sheshimdi jaqtaıtyndaı. Ataýly kúndi merekeleý 27 tamyzǵa josparlanyp otyr. Vengrler ot shashý sol kúni mindetti túrde bolady dep úmittenip otyr.