Saıası tutqyndar men Qańtar oqıǵasy qurbandaryna qoldaý kórsetý úshin qurylǵan qoǵamdyq "Arasha" komıteti azamattyq belsendi, tirkelmegen Demokratıalyq partıa bastamashyl tobynyń jetekshisi "Janbolat Mamaıdyń isindegi tergeýshilerdiń zańsyz tásilderi týraly" málimdeme jarıalady. Málimdeme mátinin belsendiniń zaıyby, jýrnalıs, quqyqqorǵaýshy Inga Imanbaı óziniń facebook paraqshasynda jarıalady.
Málimdemede komıtetke qańtar oqıǵasyna qatysty isterdi tergeıtin vedomstvoaralyq tergeý-operatıvti top tergelip jatqandardy Janbolat Mamaıǵa qarsy kýálik berýge májbúrlep jatqany týraly aqparat jetkeni aıtylady. Komıtet aqparat rastalsa, onda bul áreketti qamaýda otyrǵandar quqyǵyn óreskel buzý faktisi retinde baǵalaýǵa bolady dep sanaıdy.
"Bul aqparatqa sener bolsaq, qamalǵandarǵa prosesýaldyq kelisimge kelýdi usyna otyryp, eger olar J. Mamaıǵa jala japsa, olardy bosatyp jiberetinderin, al kelispese, uzaq jylǵa bas bostandyǵynan aıyrylýy múmkin ekenin aıtyp qorqytatyn kórinedi. Bul aqparat rastalyp jatsa, buny J.Mamaıdyń jáne ózderin jalǵan kýálik berýge, ıaǵnı, qylmysqa májbúrlep jatqan, sotqa deıingi tergeý kezeńinde qamaýda otyrǵan basqa da jandardyń quqylaryn buzatyn óreskel fakti dep sanaımyz. Bul aqparat boıynsha, tergeýshilerge resmı emes ol buıryqty vedomstvo aralyq tergeý-operatıvti toptyń jetekshisi K. Kúnǵojınov bergen kórinedi. Munyń bári J. Mamaıǵa qarsy istiń saıası astary bar ekenin bildirip, onyń ózine tańyp otyrǵan isterge qatysy bar degen dálelderge kúmán keltiredi. Óıtkeni, basqasha bolsa, tergeýshiler bógde adamdardy oǵan jala jabýǵa májbúrlemegen bolar edi" delingen komıtet málimdemesinde.
Sondaı-aq málimdemede aqparat rastalyp jatqan jaǵdaıda, onda qańtar oqıǵasy boıynsha ótip jatqan, ásirese, saıası opozısıa men azamattyq belsendilerge qatysty tergeýler belgili bir saıası maqsatpen, zańsyz tergeý amaldaryn qoldana otyryp júrip jatqanyn kórsetetini aıtylady.
"Osy málimdememiz arqyly biz tek qoǵamǵa ǵana úndeý tastap otyrǵan joqpyz. Sondaı-aq, qysym jasalyp jatqandarǵa da, tarıhta esh nárseniń de – satqyndyq ta, ótirik te – umytylmaıtynyn eskerte otyryp, olardyń ózderin de, qorǵaýshylary men týystaryn da mundaı tergeýshilerdiń jeteginde ketpeýge shaqyramyz. Biz bul aqparattyń jiti tekserilýin, al ol rastalyp jatsa, kinálilerdi jaýapqa tartýdy talap etemiz. Al, óz tarapymyzdan, osy sıaqty qandaı da bir is-áreketti jarıalap, qoǵamnyń nazaryn aýdaryp otyratynymyz týraly málimdeımiz" deıdi komıtettegiler.
Pikir qaldyrý