Búgin  Májilis depýtaty Samat Mýsabaev «AMANAT» partıasynyń Mańǵystaý oblystyq fılıalynda óńirdegi qurylysshylar men jobalaýshy uıym ókilderimen, memlekettik jáne jeke saraptama qyzmetin kórsetetin ujym ókilderimen kezdesti.

Jıynda qurylys salasynyń mamandary jobalyq, smetalyq qujattyń  durys jasalmaıtynyn aıtyp, ár tarap ózderiniń ýájderin jetkizip, qurylys salasyndaǵy kemshilikterdi talqyǵa saldy.

Kompanıa basshylary qurylys materıaldarynyń qymbattaǵanyn, sonyń saldarynan qurylys jumystarynyń keshigip jatqanyn, sondaı-aq ony jalǵastyrý úshin bıýdjetten qosymsha qarjy bólinse degen usynystaryn aıtty.

«Basty másele jobalyq, smetalyq qujattyń durys jasalmaýy. Buǵan kim kináli: qurylysshy ma, jobalaýshy uıym ba, álde saraptaý uıymy ma? Jıynda osy másele uzaq talqylandy. Budan keıingi úlken másele – qurylys materıaldarynyń qymbattaýy. Búgingi tańda osy qymbatshylyq áserinen toqtap qalǵan qurylystardy júrgizý úshin búdjetti qaıta qaraý kerek», – dedi Samat Musabaev.

Depýtat aldaǵy ýaqytta atalǵan máselelerdi baqylaýyna alatyn jetkizdi.

Sonymen qatar búgin Májilis depýtaty Amanjol Áltaı Ulytaý oblysynyń  Jezqazǵan qalasyndaǵy kıim jáne turmystyq jáne tehnıkalyq maqsattaǵy buıymdardy óndiretin «Iýtarıa» JSHS eńbek ujymymen kezdesti.

Jezqazǵan qalasyndaǵy sehta búgingi tańda 300-den asa qyzmetkerler úsh aýysymda eńbek etedi. Tiginnen bólek, bul mekemeniń qala boıynsha birneshe saýda ortalyqtary bar. Onyń biri Jezqazǵan jáne Sátbaev qalalarynyń ortasynda ornalasqan gıpermarket eki qalanyń turǵyndaryn jumys ornymen qamtamasyz etip otyr.

Jıynda depýtat ujym qyzmetkerleriniń jalaqyǵa qatysty talap-tilekterin tyńdap, óndiristik salada eńbek etip júrgen azamattardyń máselelerin aldaǵy ýaqytta kóteretinin jetkizdi.

Májilistiń baspasóz qyzmeti