Qazaqstanda mindetti áleýmettik medısınalyq saqtandyrýdyń jańa ádisi iske qosyldy. Endi sońǵy 12 aıǵa jarna tóleýdiń qajeti joq, dep habarlady Medısınalyq saqtandyrý qory.
Buǵan deıin "Mindetti áleýmettik medısınalyq saqtandyrý týraly" zańyna ózgeris engizilgen bolatyn. Jańa normaǵa sáıkes, aldaǵy 12 aıǵa jarna tólep, medısınalyq qyzmetterdi paıdalanýǵa múmkindik bar.
Qordyń aqparattyq-túsindirý jumysy basqarmasynyń basshysy Irına Podskochaıanyń aıtýynsha, 2020 jyldan beri jarna tóleý barlyǵyna birdeı mindet. Alaıda beıresmı jumys isteıtinderdiń kóbisi jarna tólemeıdi nemese tólemdi turaqty jasamaıdy.
– MÁMS týraly zańnyń jańa normasyn engizgenge deıin saqtandyrylý mártebesi ótken 12 aı úshin júıeli tólem bolǵan kezde ǵana berildi. Sondyqtan MÁMS tizimine kiretin medısınalyq kómek alý qajettigi týyndaǵan kezde saqtandyrylmaǵan adamdar tólem jasamaǵan aılar úshin jarnalardy, ıaǵnı bereshekti tóleýi kerek edi. Alaıda bul nusqa báriniń birdeı kóńilinen shyqpady. Endi saqtandyrýdyń balamaly tásili paıda boldy. Aldaǵy 12 aı úshin jarnalardy tóleýge múmkindik bar. Bul jyl boıy MÁMS-te medısınalyq kómekke qol jetkizýge múmkindik beredi, – deıdi Podskochaıa.
Osylaısha, saqtandyrý mártebesin alý úshin sońǵy bir jyldyń bereshegin jaýyp, medısınalyq qyzmet alýǵa múmkindik beriledi. Sondaı-aq aldaǵy 12 aıǵa tólep, bir jyl boıy paıdalanýǵa bolady. Jarnany ekinshi deńgeıli bankter, bankterdiń mobıldi qosymshalary, Qazposhta jáne tólem termınaldary arqyly derbes tóleýshi retinde ár aı úshin jeke 3 000 teńgeden tóleý kerek.
"Azamattarǵa arnalǵan úkimet" memlekettik korporasıasy barlyq tólemdi 2-3 kún ishinde óńdeıdi. Medısınalyq saqtandyrý boıynsha barlyq suraq boıynsha emhananyń pasıentterge qoldaý kórsetý qyzmetine habarlasýǵa bolady.
– Eger ol jerde sizge kómektese almasa, onda ózińizge yńǵaıly baılanys arnasy arqyly Áleýmettik medısınalyq saqtandyrý qoryna - fms.kz resmı saıty, 1406 baılanys ortalyǵy, Telegram-daǵy SaqtandyryBot jáne Qoldau 24/ 7 mobıldi qosymshasyna ótinish jibere alasyz. Dál osy quraldar arqyly saqtandyrý mártebesin tekserýge bolady, - deıdi mamandar.
Pikir qaldyrý