Májilis tóraǵasy Erlan Qoshanov aldaǵy prezıdent saılaýy týraly pikir bildirdi.

– Bıylǵy prezıdent saılaýy 7 jyldyq merzimmen ótýi kerek dep esepteımin. Bul – meniń jeke pikirim. Ony áriptesterim de qoldap otyr, – dedi palata spıkeri.

Erlan Qoshanovtyń aıtýynsha, prezıdenttik basqarý formasyndaǵy Qazaqstan úshin prezıdenttiń qaıta saılaný quqyǵynsyz 7 jyldyq merzimge saılanýy – óte qajetti ári mańyzdy norma. Ol el damýynyń lıberaldyq baǵytyn kúsheıtedi jáne prezıdent reformalaryna tolyq sáıkes kelip otyr. Bul  –sýperprezıdenttik basqarý formasynan túbegeıli arylýǵa múmkindik beredi.

Erlan Qoshanov bıliktiń jıi aýysýyn qamtamasyz etetin norma onyń monopolıalanýyna jol bermeıdi, 7 jyl qolǵa alǵan reformalardy iske asyrý úshin jetkilikti ýaqyt dep esepteıdi.

Sonymen birge palata spıkeri eger prezıdent qazir 5 jylǵa saılansa, sodan keıin konstıtýsıaǵa 7 jyldyq prezıdenttik merzim týraly túzetýler engizilse, onda saılanǵan prezıdentke taǵy da 7 jyldyq merzimge qaıta barý úshin quqyqtyq múmkindik paıda bolýy múmkin ekenin aıtty.