Qostanaı oblysyndaǵy alapat órtke qatysy bar alǵashqy kúdikti qamaýǵa alyndy. Qolyna kisen salynǵan Basaman orman sharýashylyǵy mekemesiniń basshysyna laýazym ókiletin teris paıdalanyp, aýyr zardapqa ákep soqtyrdy degen aıyp taǵylǵan, dep habarlaıdy ulysmedia.kz. 

Jalpy, tabıǵı apattan keıin oblystyq prokýratýra 3 birdeı qylmystyq is boıynsha tergeý júrgizip jatyr.

"Áýlıekól aýdanynda orman qorynyń órtený faktisi boıynsha bıyl 4-qyrkúıekten bastap prokýratýramen QK 202-babynyń 3-bóligi, atap aıtqanda, aýyr zardaptarǵa ákep soqqan nemese asa iri zalal keltirilgen bireýdiń múlkin qasaqana búldirý jáne QK 341-baby 2-bóligi ormandardy joıý nemese búldirý boıynsha qylmystyq ister tergelýde", deıdi Qostanaı oblysy prokýratýrasynyń basqarma prokýrory Nursultan Satýbaldın. 

Bıyl 15-qyrkúıkte sotpen mekeme basshysyna qatysty kúzetpen ustaý túrindegi bultartpaý sharasyna sanksıa berildi. Tergeý jalǵasýda. Quzyrly organnyń málimetinshe, kúlli eldi eseńgiretken Qostanaıdaǵy órt Basaman orman sharýashylyǵynda bastalǵan bolatyn. Sol ýaqytta mekemeniń basshysy ot tutanǵan aýmaqqa ormanshylar barmaǵan dep ashyq aıtqan. Qazir kúdikke ilingen Asqat Jaqashev besinshi dárejeli órtpen kúresýge qaýqarsyzbyz dep aıtqan edi. Sodan keıin qyzyl jalyn kúsh alyp, tutas Áýlıekól aýdanyna taralǵan.

Órt sóndirýshiler apta boıy alysqan tilsiz jaý 43 myń gektar orman alqaby men 91 úıdi kúlge aınaldyrdy. Bir adamnyń máıiti úıindiniń arasynan tabyldy. Eki myńǵa jýyq adam qaýipsiz jerge kóshirildi. Úıi men dúnıe-múlkinen aıyrylǵan jandarǵa qazir jańa úı salynyp jatyr. Qurylys eki jarym aıda aıaqtalady dep josparlanǵan. Órtten zardap shekken aýyl aǵaıynyna eldiń túkpir-túkipirinen gýmanıtarlyq jáne qarjylaı qoldaý kórsetilip jatyr.