Almatyda "Qazposhtanyń" 100-ge jýyq qyzmetkeri narazylyqqa shyqty, dep habarlady jýrnalıs Mıhaıl Kozachkov Telegram paraqshasynda.

Bastamashy top Almatydaǵy "Qazposhta" fılıaldarynyń biriniń aldyna jınalǵan.

"Búgin "Qazposhta" qyzmetkerleri ereýilge shyqty. Olar jalaqyny kóterýin talap etip otyr (búginde olar qolyna 80-90 myń teńge, al poshtashylar 40 myń teńgeden az alady)", dep jazdy Mıhaıl Kozachkov. 

Almatyǵa "Qazposhta" basqarma tóraǵasy Serik Saýdabaev ushyp kelgeni habarlandy. Ol jumysshylarmen kelissóz júrgizbek.

"Áleýmettik jelilerde jarıalanǵan jalaqy mólsheri týraly aqparattyń shyndyqqa janaspaıtynyn habarlaımyz. 40 myń teńge kólemindegi tólemdi 0,3 stavkamen, ıaǵnı tolyq emes jumys kúnimen jumys isteıtin 4 poshtashy ǵana alady. 0,3 stavka boıynsha jumys ýaqyty aıyna 24 saǵatty quraıdy (tolyq mólsherleme normasymen – 176 saǵat). Qazirgi ýaqytta "Qazposhta" AQ-da jumys kóleminiń tómendeýine baılanysty tolyq emes jumys kúnimen jumys isteıtin qyzmetkerlerdiń sany (0,4, 0,5, 0,6, 0,7, 0,8 jáne 0,9) 47 adamdy quraıdy" dedi "Qazposhta" ókili.