Keńes jáne Reseı estradasyndaǵy belgili ártis Alla Pýgacheva Reseıdiń Ýkraınaǵa basyp kirgenin ashyq aıyptap, sol úshin Reseıde shetel agenti tizimine engizilgen kúıeýi, parodıst, telejúrgizýshi Maksım Galkındi qoldaıtynyn, onymen pikirles ekenin málim etti.
"Reseı Fedarasıasy Ádilet mınıstrligine úndeý. Meni súıikti elimdegi shetel agenti qataryna qosýdy suraımyn, óıtkeni men adal, shynshyl, Reseıdiń naǵyz jáne satylmaıtyn patrıoty, otanymyzdyń órkendeýin qalaıtyn, beıbit ómirdi, sóz bostandyǵyn, elimizdi oqshaýlap azamattar ómirin aýyrlatanyn ıllúzıalyq maqsattar úshin balalarymyzdyń ólgeni toqtaǵanyn tileıtin kúıeýimmen bir pikirdemin" dep jazdy ártis.
Alla Pýgachevanyń 20 saǵat buryn jarıalaǵan jazbasy osy sátte 630 myńnan astam laık, 84 myńǵa jýyq pikir jınaǵan. pikir jazýshylardyń basyp kópshiligi ony qoldap jatyr.
Ártistiń jazbasynda "Ýkraına" týraly birde-bir sóz joq. Alaıda jurtshylyq jazbany Reseı bıliginiń basqynshylyǵyn aıyptaý dep qabyldap, onyń áreketin joǵary baǵalap jatyr.
Maksım Galkın Reseıdiń Ýkraınaǵa basqynshylyǵyn batyl ári ashyq aıyptaýshylardyń biri. Ol aqpan aıynan beri Izraılde júr, konsertterinde soǵysqa degen synı kózqarasyn jasyrǵan emes. Galkın soǵysty aıyptaǵan alǵashqy kúnderde-aq onymen jasalǵan Reseı televıdenıesindegi jáne jarnamalyq kelisimder buzylǵan. 16 qyrkúıekte Reseıdegi "shetel agenti" reestrine engen.
Pikir qaldyrý