Búgin májilis tóraǵasy Erlan Qoshanovtyń tóraǵalyq etýimen parlament májilisiniń VII shaqyrylymy III sesıasynyń alǵashqy jalpy otyrysy ótti. Kún tártibine kirispes buryn palata tóraǵasy memleket basshysy Q.Toqaevtyń halyqqa joldaǵan Joldaýynyń basym baǵyttaryna toqtaldy.

«Joldaý buryn bastalǵan reformalardyń logıkalyq jalǵasy bolyp tabylady. Óte mańyzdy, elimizdiń bolashaq damýyna, taǵdyryna qatysty aýqymdy máseleler kóterildi. Eń bastysy, memleket basshysy joldaýda alǵash ret bolashaq saılaý naýqandarynyń kestesin jarıalap, elimizdiń búkil saıası júıesiniń jańaryp-jańǵyrýyna jol ashyp berdi» dedi E.Qoshanov.

Májilis tóraǵasynyń pikirinshe, joldaýda aıtqan barlyq máseleler qoǵam suranysyna saı keledi. Qazir qazaqstandyqtardy tolǵandyratyn eń basty másele – ekonomıkanyń damýy, halyqtyń ál-aýqatyn arttyrý. Eldi baǵa men tarıfterdiń ósýi alańdatyp otyr. Prezıdent joldaýda kóptiń kókeıinde júrgen osy suraqtarǵa naqty jaýap berdi. Ol «Azamat – bıznes – memleket» arasyndaǵy qatynasty túbegeıli ózgertýdi usyndy.

Sonymen qatar palata spıkeri el prezıdenti parlament jumysynyń negizgi baǵyttaryn aıqyndap bergenine basa nazar aýdardy.

«Aǵymdaǵy sesıada depýtattar jumys isteıtin zań jobalarynyń erekshe mańyzy bar jáne ony qoǵam da kútip otyr. Sondyqtan, olardy qaraý kezinde halyqtyń, azamattyq qoǵam ókilderi men sarapshylardyń pikiri meılinshe eskerilýge tıis», – dedi E.Qoshanov.

Jalpy otyrys barysynda depýtattar birqatar jańa zań jobalaryn jumysqa aldy. Olar: «Qazaqstan Respýblıkasynyń Konstıtýsıalyq Soty týraly», «Qazaqstan Respýblıkasyndaǵy Adam quqyqtary jónindegi ýákil týraly», «Prokýratýra týraly», «Qazaqstan Respýblıkasynyń keıbir konstıtýsıalyq zańdaryna memleket basshysynyń 2022 jylǵy  16 naýryzdaǵy Joldaýyn iske asyrý máseleleri boıynsha ózgerister men tolyqtyrýlar engizý týraly» Konstıtýsıalyq zań jobalaryn jumysqa aldy.

Sonymen qatar palata komıtetteri Ákimshilik quqyq buzýshylyq týraly kodeksine ózgerister men tolyqtyrýlar engizý týraly, 2023 – 2025 jyldarǵa arnalǵan respýblıkalyq búdjet týraly jáne densaýlyq saqtaý máseleleri boıynsha zań jobalaryn jumysqa aldy.

Sondaı-aq, jalpy otyrys barysynda depýtattar birqatar halyqaralyq ratıfıkasıalyq zań jobalaryn jumysqa aldy

Jalpy otyrysta palata Qazaqstan Respýblıkasy parlamenti májilisiniń depýtaty  Andreı  Grıgorevıch Lınnıktiń ókilettigin merziminen buryn toqtatý týraly qaýly qabyldady. 

Májilistiń baspasóz qyzmeti