Reseıdiń Astrahan oblysynyń Qazaqstanmen shekara beketinde mobılızasıalyq pýnkt ashylady, dep jazady reseılik Kommersant basylymy.

Reseı úkimetiniń habarlamasyn keltirgen basylym shekaradaǵy ótkizý pýnktterinde azamattardy jeke-jeke mobılızasıa tizimine engen-enbegenin tekserip, engen jaǵdaıda ary qaraı ótkizbeı jatqanyn habarlady.

Reseıdiń kórshi eldermen shektesetin shekaralarynyń barlyǵynda elden shyqqysy kelgenderdiń birneshe shaqyrymǵa sozylǵan keptelisi áli seıilgen joq. Kreml azamattardyń shetel asýyn toqtatý úshin túrli shara qabyldap jatyr.

Máselen, keshe Fınlándıamen shekaradaǵy "Torfánovka" beketinde shaqyrý pýnkti ashylǵan. Grýzıamen shekardaǵy "Verhnıı Lars" beketinde azamattar shekarany zańsyz kesip ótýge tyrysqan jaǵdaıǵa dep oq ótkizbeıtin áskerı tehnıka qoıylǵan. Soltústik Osetáda tipti elden shyǵýǵa shektep qoıyldy.

Reseı bıligi mobılızasıaǵa enetin azamattardyń elden shyǵýyna baılanysty naqty eshteńe aıtpaı otyr. Qorǵanys mınıstrligi azamattar qozǵalysyna shekteý joq dese, dýma depýtaty Vácheslav Volodın mobılızasıa týraly zańǵa sáıkes, áskerı esepte turǵan azamat áskerı komısarıat ruhsatynsyz turǵylyqty jerinen shyǵa almaıtynyn aıtady.