Májilis spıkeri Erlan Qoshanov Qazaqstan Respýblıkasynyń Prezıdenti Qasym-Jomart Toqaevtyń tapsyrmasymen IV Dúnıejúzilik kóshpendiler oıyndarynyń saltanatty ashylý rásimine qatysty.

Kóshpendiler oıyndaryna álemniń 102 elinen 3 myńnan astam sportshy qatysýda. Qazaqstannyń atynan 50 sportshy saıystyń bes túrinen baq synasady. Olar – kókpar, qazaq kúresi, dástúrli sadaq atý, jamby atý, kók bóri.

Májilis tóraǵasy dúbirli doda aldynda Qazaqstan qurama komandasy múshelerimen arnaıy kezdesti. Olarǵa memleket basshysynyń jyly lebizin jetkizip, jeńis tiledi.

Májilis spıkeri Dúnıejúzilik kóshpendiler oıyndary baýyrlas elderdiń mádenı baılanystaryn kúsheıtip, túrki áleminiń ortaq qundylyqtaryn álemge pash etýde mańyzy zor ekenin atap ótti.

– Qazir kúlli Qazaqstan halqy sizderge jankúıer bolyp otyr. Qorjyndaryńyz altynǵa tolsyn. Qazaq sportshylarynyń qandaı myqty ekenin dúbirli dodada dáleldep, el abyroıyn asqaqtata berińizder, – dedi májilis spıkeri.

İs-shara aıasynda Erlan Qoshanov Túrkıa Respýblıkasynyń Prezıdenti Rejep Taııp Erdoǵanmen kezdesti. Májilis tóraǵasy Atajurttan Qazaqstan Prezıdenti Qasym-Jomart Toqaevtyń jyly lebizi men zor yqylasyn jetkizip, Túrkıada alǵash ret ótkizilip jatqan Dúnıejúzilik kóshpendiler oıyndarynyń saltanatty ashylýymen quttyqtady.

– Jyl ótken saıyn bizdiń memleketterimiz arasyndaǵy yntymaqtastyq artyp kele jatyr. Bul ózińizdiń Qazaqstan Prezıdenti Qasym-Jomart Toqaevpen dostyq qarym-qatynastaryńyz ben jemisti dıalogtyń nátıjesi dep bilemin.  Osy oraıda Sizdiń osy jylǵy qazan aıyna josparlanǵan Qazaqstanǵa saparyńyzdy asyǵa kútýdemiz. Bul sapar baýyrlas elderimizdiń arasyndaǵy tyǵyz qarym-qatynasty jańa deńgeıge kóterip, odan ári nyǵaıýyna zor múmkindik týǵyzatynyna senimdimiz, – dedi Erlan Qoshanov.

Óz kezeginde, Túrkıa Prezıdenti Qazaqstannyń túrki álemi men Túrki memleketteri uıymyndaǵy mańyzdy rólin atap ótip, májilis spıkerine IV Dúnıejúzilik kóshpendiler oıyndarynyń ashylýyna qatysqany úshin rızashylyǵyn bildirdi.

– Qazaqstandaǵy turaqtylyq búkil óńir úshin mańyzdy. Bul oraıda Prezıdent Qasym-Jomart Toqaevtyń júrgizip jatqan reformalary men kezekten tys prezıdenttik saılaý ótkizý jónindegi bastamasyn qoldaımyn. Qazaqstandaǵy úderisterdi erekshe baqylap otyrmyn. Jalpy, Qazaqstan men Túrkıa arasyndaǵy ekijaqty qatynastar joǵary deńgeıde damyp keledi. Osy oraıda parlamentaralyq yntymaqtastyqtyń mańyzdylyǵy zor, – dedi R.T.Erdoǵan.

Májilis spıkeri Qazaqstan Parlamenti men Túrkıa Uly Ulttyq Jınalysy arasyndaǵy, sonyń ishinde parlamentaralyq uıymdar aıasynda eki jaqty yntymaqtastyqtyń qazirgi aýhaly týraly baıandap, birlesken jumys barlyq sala boıynsha belsendi jalǵasa beretinin aıtty.

Májilis tóraǵasy Qazaqstan kelesi V Dúnıejúzilik kóshpendiler oıyndaryn ótkizý jóninde usynys bergenin aıtyp, túrki qoǵamdastyǵy ony qoldaıtynyna senim bildirdi.

Sonymen birge Erlan Qoshanov Túrkıanyń burynǵy premer-mınıstri Bınalı Iyldyrymmen kezdesip, taraptar eki el yntymaqtastyǵynyń qarqyndy damyp kele jatqanyn atap ótti.

Májilistiń baspasóz qyzmeti