Qańtar oqıǵasy kezinde qıraǵan Respýblıka alańyndaǵy Almaty qalasy ákimi apparatynyń ǵımaratyn jóndeýge jarıalanǵan tenderdi qalalyq máslıhat depýtaty Ámirjan Nábıevke tıesili kompanıa esh konkýrssyz jeńip alǵan. Bul týraly Shishkin_like telegram kanaly habarlady.

Prosedýra bir kózden satyp alý tásili arqyly ótip, tapsyrys berýshi qalalyq Qurylys basqarmasy men merdiger "Atrıks-Stroı" qurylys kompanıasy tikeleı kelisim-shart jasasqan. Kelisim-shart somasy – 10,3 mlrd teńge. Bul soma naqty emes, tek jobalyq-smetalyq qujat pen memlekettiń saraptama qorytyndysynan keıin tolyq maquldanady.

Kompanıanyń jıyrma jyldan bergi birinshi basshysy ári ıeleriniń biri Ámirjan Nábıev Almaty máslıhatyna kiretin 38 depýtattyń búginde qala basshylyǵymen kelisim-shart jasasqan altaýynyń biri. Qala búdjetinen eń kóp qarjy alatyn da osy depýtatqa tıesili kompanıa.

Ámirjan Nábıev 2013 jyly burynǵy Nur-Otan qazirgi Amanat partıasynyń qataryna qosylyp, kelesi jyly-aq Almaty máslıhatyna depýtat bolyp saılanǵan. Sodan beri úsh shaqyrylym boıy jyly ornynan aýysqan emes. Osy aralyqta depýtatqa tıesili kompanıa ákimdikke qarasty basqarmalarmen jalpy jıyntyǵy 13,5 mlrd teńgege shart jasasqan. Al qalalyq qurylys basqarmasymen 2017 jyldan beri jumys isteıdi. Oryndaǵan 6 tapsyrystyń tek ekeýin ashyq konkýrs arqyly utyp alǵan.