Qasym-Jomart Toqaev aldaǵy merziminen buryn ótetin prezıdent saılaýyna óziniń úmitkerligi úshin qurylǵan "halyqtyq koalısıa" atynan túsetinin málim etti.

"Barshańyz usynǵan ortaq kandıdat retinde prezıdent saılaýyna túsý – men úshin zor mártebe ári úlken jaýapkershilik" degen prezıdent qurylǵany búgin ǵana habarlanǵan koalısıada "barlyq áleýmettik toptar qamtylǵan" dep atap ótti.

Búgin AMANAT partıasynyń sezinde partıa tóraǵasy Erlan Qoshanov aldaǵy prezıdent saılaýyna qazirgi prezıdent Qasym-Jomart Toqaevtyń úmitkerligin qoldaý jónindegi halyqtyq koalısıa qurylatynyn málim etken.

AMANAT partıasy sıeze Qasym-Jomart Toqaevty prezıdenttikke kandıdat retinde usynǵan. Budan bólek "Qazaqstan Halyq partıasy", máslıhattar depýtattarynyń respýblıkalyq qoǵamdyq birlestigi, "Qazaqstan sportshylar odaǵy" respýblıkalyq qoǵamdyq birlestigi, Qazaqstannyń Azamattyq alánsy, "Ardagerler uıymy" respýblıkalyq qoǵamdyq birlestigi, "Qazaqstan Team" qoǵamdyq birlestigi, Ulttyq volonterlik jelisi qazirgi prezıdent úmitkerligin usynǵan.

Koalısıa týraly keshe prezıdent Pavlodar oblysyna jasaǵan saparynda aıtqan. Ol aldaǵy saılaýǵa qoǵamdyq-saıası kúshter koalısıasynyń atynan qatysqandy jón kórip otyrǵanyn jetkizgen bolatyn.