Qazaqstandyq Ábıba Abýjaqynova men Eldos Smetov Tashkentte ótip jatqan dzúdodan álem chempıonatynda qola medalǵa ıe boldy.
48 kelide baq synaǵan Ábıba Abýjaqynova ekinshi aınalymda brazılıalyq Amanda Lımany, úshinshi aınalymda fransıalyq Shırın Býklıdi, shırek fınalda serbıalyq Mılısa Nıkolıchti jeńdi. Al jartylaı fınalda japon Natsýmı Sýnodadan (byltyrǵy álem chempıony) jeńildi. Ábýjaqynova qolaǵa talasta chılılik Marı De Vargastan basym tústi.
Abýjaqynova – dzúdodan álem chempıonatynda júlde alǵan alǵashqy qazaq qyzy. Buǵan deıin álem chempıonatynda Qazaqstan quramasynan Mońǵolıadan aýysqan Galbadrah Otgonseseg eki ret qola (2017, 2018) medal ıelengen edi.
Abıba Ábýjaqynova – Ózbekstanda dúnıege kelgen. Ol álem birinshiliginde júldege iliný arqyly óz mansabyndaǵy eń úlken jetistigine qol jetkizip otyr. Abıbanyń enshisinde Azıa chempıonatynyń eki kúmis júldesi men Grand-slem týrnıriniń qola medali bar.
Erler arasynda 60 kelide kilemge shyqqan Eldos Smetov kezekti ret álem chempıonatynda júldedi boldy. Ol bastapqyda ázerbaıjan sportshysy Karamat Hýseınovty, ızraıl balýany Matan Kokolaevty jeńip, shırek fınalda taıpeılik Ian Iýn Veıden utyldy. Jubanysh beldesýinde ıspanıalyq Fransısko Garrıgosty, qola medal úshin ótken beldesýde ózbekstandyq Dılshodbek Baratovtan basym tústi.
Eldos Smetov buǵan deıin 2015 jylǵy álem chempıonatynda altyn, 2019 jylǵy birinshilikte qola ıelengen. 2016 jylǵy Rıo olımpıadasynyń kúmis júldegeri. Armany – olımpıada altynyn alý.
Pikir qaldyrý