Almaty qalasy Áýezov aýdanynyń soty Bolat Nazarbaevtyń ar-namys pen abyroıyn qorǵaý týraly aryzyn qanaǵattandyrdy, dep habarlady Sybaılas jemqorlyqty tergeý búro-qory.  Eks-prezıdenttiń inisi Bolat Nazarbaev ózin reıderlik jolmen bıznesin tartyp aldy dep aıyptaǵan "Almaty Steklo" JSHS quryltaıshysy Ázim Abdýllaevtan jarty mıllıon teńge óndirip alǵan. 

Ázim Abdýllaev Bolat Nazarbaevty shyny zaýytyn reıderlik jolmen tartyp aldy dep aıyptap, ekonomıkalyq sotqa shaǵym túsirgen bolatyn. Bul aıyptaýmen kelispegen Bolat Nazarbaev ar-namysy men abyroıyn qorǵaý úshin N2 Áýezov aýdandyq sotyna júgingen. Nazarbaev óziniń uzaq ýaqyt boıy aýyrǵanyn jáne fızıkalyq jaǵynan eshkimge zıan tıgize almaıtynyn alǵa tartqan.

Nazarbaevtyń ókili BAQ pen áleýmettik jelilerde Ázim Abdýllaev talapkerdiń, ıaǵnı Bolat Nazarbaevtyń ar-namysyna, abyroıyna jáne iskerlik bedeline nuqsan keltiretin shyndyqqa janaspaıtyn aqparat taratqanyn aıtty. Ol 1,5 mıllıon teńge kólemindegi moraldyq shyǵyn óteýdi talap etken. Sot talapty ishinara qanaǵattandyryp, 1,5 mıllıon teńgeniń ornyna Ázim Abdýllaevtan 500 myń teńge óndirý týraly sheshim shyǵarǵan.