Memlekettik aıyptaýshy Baýyrjan Shekenov sottan burynǵy densaýlyq saqtaý mınıstri Eljan Birtanovty kináli dep taýyp, ony 6 jylǵa bas bostandyǵynan aıyrýdy surady, dep habarlady Ulysmedia.kz saıty.

"Birtanovty QK-niń 361-baby 4-bóligi 3-tarmaǵy («Qyzmettik ókilettikterdi teris paıdalaný») boıynsha kináli dep taýyp, memlekettik qyzmette laýazymdardy atqarý quqyǵynan ómir boıyna, bas bostandyǵynan 6 jylǵa aıyrý jazasyn taǵaıyndaýdy suraımyn" dedi Baýyrjan Shekenov.

Eks-mınıstrdiń 2020 jylǵy 7 qarashadan bastap úkim shyǵarylǵan kúnge deıingi úıqamaǵynda ustaý merzimindegi eki kúnin jazany óteýdiń bir kúni esebimen jaza merzimine esepteý usynyldy.

Birtanovtyń burynǵy orynbasary Oljas Ábishevti de dál osyndaı jaǵdaıda prokýror 5 jylǵa bas bostandyǵynan aıyrýdy surady.

Shekenov Birtanovty "Qurmet" memlekettik syılyǵynan aıyrýdy da usynady.

Sonymen qatar, prokýror eks-mınıstr men Ábishevten 1 548 136 575 teńgeni teń úlespen jáne Birtanovtan sanıtarlyq avıasıany paıdalanǵany úshin jumsalǵan 5 503 721 teńgeni óndirýdi surady.