Beıbit jıyn ótkizý tártibin buzdy degen aıyppen 15 táýlikke qamalǵan táýelsiz jýrnalıs, Ne Deidi youtube jobasynyń avtory Dýman Muhammedkárimge áleýmettik jelide qoldaý kórsetip jatqandar sany sát saıyn artyp keledi.
Jýrnalısiń bostandyǵyn talap etkender arasynda onyń áriptesteri, belsendiler jáne quqyqqorǵaýshylar bar.
Jýrnalısi qoldaýshylar sondaı-aq jurtshylyqty Ne Deidi youtube arnasyna jazylyp, arna jazylýshylarynyń sanyn 1 mıllıonǵa jetkizýge atsalysýǵa shaqyryp jatyr.
Dýman Muhammedkárim keshe kúndizgi ýaqytta úıine Almaty oblysy Ótegen batyr aýdany Polısıa basqarmasynyń qyzmetkerleri kelip, shaqyrý qaǵazyn bergenin habarlaǵan.
Jýrnalıs jarıalaǵan kelesi vıdeoda advokaty Ǵalym Nurpeıisov ekeýi polısıa basqarmasyna baratynyn aıtady. Ǵalym Nurpeıisov atalǵan aıyp boıynsha jýrnalısi 15 táýlikke qamaýy múmkin ekenin, osylaısha ony aýzyna qaqapaq bolýǵa tyrysyp otyrǵanyn jetkizgen.
Keshe keshke polısıa shaqyrýy boıynsha barǵan Dýman Muhammedkárimdi Almaty oblysynyń mamandandyrylǵan aýdanaralyq ákimshilik soty Ákimshilik quqyq buzýshylyq týraly kodekstiń 488 baby 7-tarmaǵy (beıbit jınalystardy uıymdastyrý jáne ótkizý tártibi týraly zańnamasynda belgilengen tártipti buzdy) boıynsha aıypty dep taýyp, 15 táýlikke ákimshilik qamaýǵa alý týraly qaýly shyǵardy. Ǵalym Nurpeıisov qaýlyǵa shaǵym túsiretinin málim etti.
Dýman Muhammedkárim ótken aptada azamattardy merziminen buryn ótkeli jatqan prezıdent saılaýyna narazylyq bildirip, Almatynyń ortalyq alańyna mıtıńke shyǵýǵa shaqyrǵan.
Jýrnalıs Ne Deidi youtube jobasy arqyly qańtar oqıǵasynyń qurbandary, azaptaýǵa ushyraǵan azamattar týraly aqparattar, beıbit jıyndardan reportajdar, saıasatkerlermen, belsendilermen suhbattar jasap keledi. Búginde arnanyń 130 myńǵa jýyq jazylýshysy bar. Jýrnalıs qyzmetin donat júıesimen, ıaǵnı jazylýshylary aýdarǵan qarajat esebinen júzege asyrady. Sonyń ótemi retinde aýdıtorıasyna shynaıy aqparat, búkpesiz áńgime usynyp, qoǵamdyq-saıası oqıǵalar týraly ustanymyn ashyq jetkizedi. Bılikke bazyna, talap-tilek aıtam deýshilerge de minber bolyp júr.
Pikir qaldyrý