13 qazanda Atyraý oblysy ákiminiń eks-orynbasary Baqytgúl Hamenovaǵa qatysty kezekti sot otyrysynda aıyptalýshylardyń biri Aqylbek Rysqalıev kútpegen málimdeme jasady. Ol óziniń bastapqyda "para berýshi men para alýshy arasynda deldal boldym" degen jaýabyn ózgertip, Hamenova 4,5 mln teńgege eshqandaı qatysy joq ekenin aıtty, dep jazady Aq Jaıyq basylymy. 

Ol bastapqyda bergen kýáligi Antıkor qyzmetkerleriniń yqpalymen bolǵanyn jetkizdi. 

– Men osyǵan deıin kóp oılandym. Osyǵan deıingi áreketterdi kórip otyryp, qatty sharshadym. Basynda, birinshi bergen jaýaptarymmen qalamyn dep tyrysqam. Meni sol ınstrýktajdan ótkizgen Antıkor qyzmetkerleri "osylaı sońyna deıin barsań, óziń úshin bári jaqsy bolady, qorǵalý quqyǵyna ıe bolasyń, jaýapkershilikke tartylmaısyń, bárinen de bosatylasyń" degen bolatyn. Biraq kúni búginge deıin olardyń tarapynan meni qorǵaý, qoldaý týraly áreketter jasalmaǵandyqtan, rasynda men qandaı maqsatta qarjy suraýǵa májbúr boldym, el úshin jasalǵan jumystardyń jyrtyǵyn jamaýǵa demeýshi kerek bolǵanyn shynymen de bári qalaı bolǵanyn aıtýǵa sheshim qabyldadym,– dedi Rysqalıev. 

Rysqalıevtiń bul málimdemesinen keıin sotqa qatysýǵa kelgenderdiń bári qol shapalaqtap, Hamenova kózine jas aldy.  

– Musylmandyq tanytqanyńyzǵa, Antıkordan emes, Alladan qoryqqanyńyzǵa, 10 aı boıy tar qapasta qamalyp otyrsam da búgin shyndyqty aıtqanyńyzǵa men rahmet aıtamyn, – dedi Hamenova.

Hamenovanyń isi boıynsha kelesi sot otyrysy 21 qazanǵa belgilendi.