Astananyń Baıqońyr aýdandyq soty Nurjan Áltaevty prezıdenttikke kandıdat retinde usynǵan "Muqalmas" respýblıkalyq qoǵamdyq birlestiginiń qaýlysyn zańsyz dep tapty.

"Birlestik músheleriniń jalpy jıynynda kópshilik kezekten tys prezıdent saılaýyna kandıdat retinde Áltaevty usynýǵa qarsy daýys bergen" delingen sot baspasóz qyzmeti habarlamasynda.

Habarlamada, Áltaevty 6 adam qoldap, 11 adam qarsy daýys bergeni, daýys bergen keı adamdar birlestik múshesi bolmaǵandyqtan daýys berýge de quqyǵy bolmaǵany aıtylady. Al Áltaev kandıdatýrasyn usyný máselesi qozǵalǵan "Muqalmas"-tyń jıynynda ózin 28 adam qoldaǵanyn, 13 adam qarsy shyqqanyn jetkizgen.

Nurjan Áltaev ortalyq saılaý komısıasyna qujattaryn 7 qazanda ótkizgen. Artynsha ony usynǵan "Muqalmas" respýblıkalyq qoǵamdyq birlestiginiń keı músheleri qaýlyǵa qarsylyq retinde sotqa aryz túsirip, OSK Áltaev qujattarynyń zań normalaryna sáıkestigin tekserýdi toqtatqan.

Saıasatker aldynan shyqqan kedergiler bıliktiń uıymdastyrýymen ádeıi jasalǵan dep sanaıdy.

Ol 2020 jyly májilis depýtaty retindegi ókilettigin toqtatyp, "El tiregi" degen atpen partıa quratynyn málim etken. Sodan beri ózin opozısıa qataryna jatqyzady. Birneshe ret ruhsat etilgen mıtıń ótkizip, partıa jaqtastary ákimshilik jaýapkershilikke tartylyp, abaqtyǵa qamalǵany bar. Alaıda  "El tiregi" belsendileriniń bılikke syny, tirkelmegen ózge partıa belsendilerimen salystyrǵanda jumsaqtaý. Partıany tirkeý boıynsha birneshe áreketi sátsiz aıaqtalǵan. Ádilet mınıstrligi "El tireginiń" qujattarynda shıkilip bar dese, belsendiler muny bıliktiń jańa saıası kúshti saıasat sahnasyna shyǵarmaýǵa tyrysýy dep baǵalaıdy.