Memleket jáne qoǵam qaıratkeri, Semeı, Pavlodar oblystarynyń burynǵy ákimi, "Qazaqstannyń demokratıalyq tańdaýy" qoǵamdyq qozǵalysyn qurýshylardyń biri Ǵalymjan Jaqıanov eks-prezıdent Nursultan Nazarbaev bılik etken tusta Semeı qalasyna sırek barǵany osy óńirden opozısıa ókilderi kóptep shyqqanymen baılanysty bolýy múmkin degen áńgimeniń jany bar degen pikirde. Bul týraly ol Dopesoz youtube jobasyna bergen suhbatynda jetkizdi.
Suhbat barysynda júrgizýshilerdiń biri birneshe jyl qatarynan Semeıge baryp, qalanyń kúıin kórip kóńili qalǵanyn, semeılikter arasynda Nursultan Nazarbaev qalaǵa sırek kelgenin Semeı óńirinen opozısıa ókilderi kóptep shyǵýymen baılanystyratyn áńgime bary týraly estigenin aıtady.
– Ol ras. Semeı oblysy men ketkennen soń bir-eki aıdan keıin jabyldy. Men 97 jyly ketkem, jańa ákimdi qoıǵanda Nazarbaev kelgen, odan keıin barǵanyn estimedim. Múmkin bir ret bolǵan shyǵar. Sodan beri saıası qubylys deımiz be, sondaıdy baıqaýǵa bolady. Semeı jerinen ózine qarsylas atanǵandar kóptep shyqqannan keıin barmaı qoıǵan shyǵar" degen ol "Semeı oblysy jabylǵannan keıin qala, halyq jaǵdaıy nasharlap, osy úshin jergilikti halyq Nazarbaevqa narazy" deıdi saıasatker.
Sondaı-aq Ǵalymjan Jaqıanov Semeı oblysyn jabýǵa qarsy bolǵanyn, Nursultan Nazarbaevtan oblysty jabý týraly sheshim qabyldamastan buryn oılanýdy suraǵanyn atap ótti.
Aqparat kózderinde Nursultan Nazarbaev sońǵy ret Semeıge 2015 jyly SHQO-ǵa jasaǵan sapary aıasynda barǵany týraly aqparat bar.
1939 jyly qurylǵan Semeı oblysy 1997 jyly jabylǵan. Óńir qazaq halqynyń baı tarıhymen tyǵyz baılanysty. Semeıde uly aqyn-jazýshylar dúnıege kelgen. Semeı Alashorda úkimetiniń astanasy bolǵan. 1991 jyldan keıin bılikte bolyp, artynsha Nazarbaevty, onyń qurǵan júıesin ótkir synaǵan birsypara azamat ta osy óńirden shyqqan. Olardyń qatarynda 1990-1995 jyldary Qazaq KSR Joǵary keńesiniń tóraǵasy, 1999 jylǵy prezıdent saılaýynda Nazarbaevtyń básekelesi, májilis depýtaty bolǵan Serikbolsyn Ábdildın, Qazaqstannyń 2-shi premer-mınıstri Ákejan Qajygeldın bar. Ǵalymjan Jaqıanov ta shyǵys týmasy. Alaıda ol dúnıege kelgen Kúrshim aýdany Semeı oblysyna kirmegen.
Pikir qaldyrý