Jýrnalıs Aıbar Oljaev "orys tilinde sóılegenderge qazaqsha jaýap berý tómengi mádenıet kórinisi" degen "ChocoFamily" kompanıalar tobynyń basshysy Ramıl Mýhorápovtyń ústinen aryz jazdy.  Jýrnalıs kásipkerdiń jelige tarap ketken replıkasyna quzyrly organ tekserý júrgizip, saraptama taǵaıyndaýy kerek dep sanaıdy.

"Osyndaı, tek zańdyq, konstıtýsıalyq prınsıppen Ramıl Mýhorápovtyń replıkasyn QR Qylmystyq Kodeksiniń 174 baby, 1 tarmaǵy boıynsha tekserýdi surap, Almaty qalasynyń Prokýratýrasyna aryz jiberdim. Aryz JT-2022-02543155 nómirimen resmı tirkeldi. 11 qarashaǵa deıin Prokýratýra resmı jaýabyn jiberedi. Eger Mýhorápovtyń qylmysy dáleldenip, sot sheshimi shyqsa, ol qandaı jazaǵa tartylýy múmkin? Mundaǵy eń mınımaldy jaza – 2 myń aılyq eseptik kórsetkish. Qazir bir AEK – 3063 teńge. Demek, ChocoFamily basshysynyń eń jeńil jazasy – 6 126 000 teńge aıyppul bolýy múmkin. Biraq tek múmkin dep turmyn. Sebebi máseleni quzyrly organdar men sot qana sheshedi", dep jazdy Aıbar Oljaev facebook paraqshasynda.

Áleýmettik jelide "ChocoFamily" kompanıalar tobynyń basshysy Ramıl Mýhorápovtyń reseıliktermen kezdesýde aıtqan sózi qyzý talqyǵa túsip, qazaqtildi aýdıtorıanyń narazylyǵyna tap bolyp jatyr. Kásipker kezdesýde "orys tilinde sóılegenderge qazaqsha jaýap berý tómengi mádenıet kórinisi" degen. Onyń bul málimdemesi biraz azamattardyń ashýyna tıip, narazylyǵyn týdyrǵan. Keı azamattar kásipker ıelik etetin "ChocoFamily" kompanıalaryń ónimderine boıkot jarıalaýǵa, ónimderin tutynbaýǵa úndegen.

Qazaqtildi aýdıtorıanyń narazylyǵynan keıin kásipker búgin aıtqan sózderin túsindirýge tyrysty.

"Eger orys tilin bilip, biraq ózińniń basymdyǵyńdy kórsetý úshin qazaq tilinde jaýap berý durys emes dep oılaımyn. Mundaı adamdardyń boıynda qazaqtyń qonaqjaılylyǵy joq. Men qazaq tilin qurmetteımin, Qazaqstan – meniń Otanym! Meniń sózderimdi durys túsinbegenin qalamaımyn. Men kez kelgen qysymǵa qarsymyn", dep jazdy kásipker.