"Orys tilinde sóılegenderge qazaqsha jaýap berý tómengi mádenıet kórinisi" degen sózi arqyly qazaqtildi aýdıtorıanyń narazylyǵyn týdyrǵan kásipker Ramıl Mýhorápov kópshilikten keshirim surady. Kásipker sózin qazaqsha bastap, keıin orys tilinde jalǵastyrǵan.
"Eń aldymen barlyǵynan keshirim suraǵym keledi. Eshkimdi renjiteıin degen nıetim bolmady. Durys aıtasyzdar. Men vıdeoda aıtqandarymdy qaıta qarap shyqtym. Vıdeoda dóreki pikir bildirip, qatty ketken jerim bar eken. Men Qazaqstan azamatymyn. Almaty qalasynda týyp óstim. Bizdiń kompanıa qyzmetkerleriniń 98 paıyzy – qazaqstandyqtar. Biz salyqty ýaqytyly tólep otyrmyz. Men qazaq tiliniń mańyzyn jaqsy túsinemin", dedi Ramıl Mýhorápov instagram paraqshasynda.
Kásipker "ChocoFamily" qosymshalaryn qazaq tiline aýdarýdy qolǵa alǵanyn jetkizip, ózi de qazaqsha úırenýge ýáde berdi.
"Qosymshalardyń birazy qazaq tiline aýdarylǵan, aýdarylyp jatqandary da bar. Men qazaq tilin jartylaı bolsa da túsinemin. Alaıda jaqsy sóıleı almaımyn. Aldaǵy ýaqytta qazaq tilin úırenetin bolamyn. Dostar, taǵy da sizderden keshirim suraımyn", dep sózin aıaqtady kásipker.
Buǵan deıin Ramıl Mýhorápovtyń reseıliktermen kezdesýde "orys tilinde sóılegenderge qazaqsha jaýap berý tómen mádenıet kórinisi" dep aıtqan sózi qazaqtildi aýdıtorıanyń qatań synyna ushyrap, narazylyǵyn týdyrǵan. Keı azamattar kásipker ıelik etetin "ChocoFamily" kompanıalaryń ónimderine boıkot jarıalaýǵa, ónimderin tutynbaýǵa úndegen.
Posmotret etý pýblıkasıý v Instagram
Pikir qaldyrý