21 qazanda Atyraý oblysy ákiminiń burynǵy orynbasary Baqytgúl Hamenovanyń isi boıynsha kezekti sot otyrysy ótti, dep jazady Aq Jaıyq basylymy. 

Buǵan deıingi sot otyrysynda kúdikti Rysqalıev "para berýshi men para alýshynyń arasynda deldal boldym" degen alǵashqy aıǵaǵyn ózgertip, Hamenovanyń 4,5 mıllıon teńgege esh qatysy joq ekenin málimdegen. Onyń aıtýynsha, ol mundaı kýálikti Antıkor qyzmetkerleriniń qysymymen bergen. 

Sot otyrysynda Antıkor qyzmetkerlerinen jaýap alyndy. Olar Rysqalıevtiń sózin joqqa shyǵaryp, oǵan eshqandaı qysym jasalmaǵanyn aıtty. 

Ári qaraı prokýror Rysqalıevtiń bastapqy aıǵaqtarynyń ózgerýine baılanysty naqtylaý úshin 2021 jyldyń jeltoqsanynda jasyryn tergeý áreketteri kezinde túsirilgen ustaý vıdeosyn qaıta qaraýdy surady. Hamenovanyń advokaty Jolbolov sotta bergen aıǵaǵyn ózgertý qorǵalýshysynyń quqyǵy ekenin aıtyp, prokýror ótinishine qarsylyq bildirdi. Ony áriptesteri men Rysqalıevtyń ózi qoldady. Olardyń pikirin tyńdaǵan sýdıa prokýrordyń ótinishin qanaǵattandyrýdan bas tartty. Osydan keıin zaldaǵylar bir aýyzdan qol soqty. Sotqa qatysýshylardyń bul áreketi sýdıaǵa unamaı, eskertý jasady: 

– Sizderge eskertý jasaımyn. Biz bul jerde óz jumysymyzdy atqaryp jatyrmyz, al sizder munda shoý jasap otyrsyzdar ma? Uıaly telefonǵa túsiresizder, qol shapalaqtaısyzdar, kúlesizder, áńgimelesesizder. Jalpy, bul tártipti buzý bolyp tabylady. Bul adamnyń minez-qulyq mádenıetin bildiredi. Sotqa qatysýdy bilmeısizder ǵoı... Basqa ótinishter bolmasa, sot jaryssózine kóshemiz, – dedi sýdıa.

Prokýror Rysqalıevtiń sotqa bergen aldyńǵy aıǵaqtaryna baılanysty jaryssózge daıyndalý úshin ýaqyt surady. Sýdıa prokýror ótinishin qanaǵattandyryp, kelesi sot otyrysyn 27 qazanǵa qaldyrdy. Hamenovanyń advokaty kelesi sot otyrysyna deıin bultartpaý sharasyn úıqamaqqa nemese eshqaıda ketpeý týraly qolhatpen aýystyrýdy surady. Alaıda sýdıa taǵylǵan aıyptyń aýyr ekenin eskerip advokat ótinishin qanaǵattyrmady.