2022 jylǵy 1 qazandaǵy jaǵdaı boıynsha 13 362 etnıkalyq qazaq tarıhı otanyna oralyp, qandas mártebesin alǵan. Bul týraly eńbek jáne halyqty áleýmettik qorǵaý mınıstrligi málim etti.

Mınıstrlik dereginshe, 1991 jyldan bastap respýblıkaǵa barlyǵy 1 mln 101,2 myń etnıkalyq qazaq oralǵan.

Osy jyldyń basynan bastap Qazaqstanǵa kelgen qandastardyń jartysynan astamy (68,7%) Ózbekstannan, 10% – QHR-dan, 7,9% – Túrkimenstannan, 4,6% – Mońǵolıadan jáne 8,8% - basqa elderden kelgen.

Etnıkalyq qazaqtar negizinen Almaty (29,9%), Mańǵystaý (16,7%), Túrkistan (9%) jáne Jambyl (6,5%) oblystaryna, sondaı-aq, Astana (7,8%), Shymkent (7,3%) jáne Almaty (5,8%) qalalaryna qonystanǵan.

Osy jylǵy 1 qazandaǵy jaǵdaı boıynsha eńbekke qabiletti jastaǵy etnıkalyq qonys aýdarýshylardyń sany 58,9%-dy, eńbekke qabiletti jastan kishi adamdar 27,5%-dy jáne zeınetkerler 13,7%-dy quraıdy.

Eńbekke qabiletti jastaǵy qandastardyń bilim deńgeıi boıynsha 13,2%-y joǵary bilimdi, 38,9%-y arnaıy orta bilimdi, 46%-y jalpy orta bilimdi jáne 1,8%-ynyń bilimi joq.