UQK Shekara qyzmeti Almaty qalasynyń prokýratýrasymen birlesip Qazaqstan aýmaǵy arqyly Aýǵanstan azamattaryn zańsyz ótkizý arnasynyń jolyn keskenin habarlady.

UQK málimetinshe, Shekara qyzmeti «Boran» arnaıy bólimshesin qoldana otyryp ótkizgen jedel-izdestirý is-sharalary barysynda Orta Azıa elderiniń biriniń jalǵan tólqujatyn usynǵan sheteldik azamatty 1,5 myń AQSH dollary somasyndaǵy aqshany alý kezinde ustaǵan.

"Ótkizilgen tintýdiń nátıjesinde birneshe qazaqstandyq uıymdardyń mórleri, 20 aýǵandyq tólqujat, týý týraly kýálikter men QR azamattyǵy men elde turýǵa yqtıar hat alýǵa, tirkelýge jáne elde bolý merzimin uzartýǵa negiz bolatyn basqa da qujattar alyndy. Atalǵan fakt qylmystyq belgileri boıynsha sotqa deıingi tergep-tekserýlerdiń biryńǵaı tizilimine QR QK 394-baby 1-bóligi (Zańsyz kóshi-qondy uıymdastyrý) boıynsha tirkeldi. Ustalǵan adam Almaty qalasy Polısıa departamentiniń ýaqytsha ustaý ızolátoryna qamaldy." delingen aqparattyq habarlamada.