Almaty oblysynyń ákimdigi men "Otbasy bank" jastarǵa arnalǵan jańa turǵyn úı baǵdarlamasyn iske qosatynyn habarlady. Joba 35 jasqa deıingi oblys turǵyndaryna jeke baspana satyp alý úshin jeńildetilgen nesıe alýǵa múmkindik beredi.

«Alataý jastary» baǵdarlamasynyń boıynsha:

♦ Qatysýshylardyń Almaty oblysyndaǵy resmı jumys ótili bir jyldan kem bolmaýy tıis. Ony mindetti túrde zeınetaqy jarnalarynyń turaqty túsimi kórsetilgen qujatpen rastaý qajet.

♦ Ótinish berýshiniń Almaty oblysynda keminde bir jyldyq merzimi bar turaqty tirkeýi bolýy kerek.

♦  Baǵdarlamaǵa qatysýshynyń jáne onyń otbasy músheleriniń sońǵy 5 jylda attaryna tirkelgen jyljymaıtyn múlikteri bolmaýy tıis.

Baǵdarlamaǵa qatysýshy jańa turǵyn úı (paıdalanýǵa berilgen bolýy tıis) satyp alsa, onda alǵashqy jarna 0% bolady. Eger ekinshi naryqtan alynǵan turǵyn úı bolsa (páter nemese jeke úı), onda alǵashqy jarna 10% quraıtyn bolady. Nesıe boıynsha syıaqy mólsherlemesi jyldyq 5%-ǵa teń (JTSM 5,2%). Nesıeniń maksımaldy merzimi – 19 jyl.

Otbasy banktyń Almaty oblystyq fılıalynyń dırektory Ǵalymjan Shalǵymbaev Almaty oblysy osyndaı baǵdarlamalardy buryn iske asyrǵan Almaty, Astana qalalary, Qaraǵandy, Jambyl jáne Qostanaı oblystarynyń ońtaıly tájirıbesin úlgi retinde alyp otyrǵanyn aıtady.

"Bul qalalardaǵy jergilikti bılik Otbasy bankimen birlese otyryp, jastardy qoldaý maqsatynda turǵyn úı baǵdarlamalaryn iske qosqan. Birinshi kezeńde oblys ákimdigi jańa jobaǵa 600 mln teńge bólip otyr. Al Otbasy bank óz kezeginde bul qarajatqa jeńildetilgen nesıe berýge kómektesedi. Osyndaı qoldaýdyń arqasynda oblys turǵyndary bıyldyń ózinde alǵashqy qonys toıyn toılaıtyn bolady" dedi Ǵalymjan Shalǵymbaev.

Jańa turǵyn úı baǵdarlamasyna qatysý týraly ótinishter 2022 jyldyń 1 qarashasynan bastap, bir aı boıy qabyldanady. Úmitkerler oblys ákimdiginiń ishki saıasat basqarmasyna ótinish berýleri qajet.

Ótinishterdi qabyldaý aıaqtalǵannan keıin ákimdikten arnaıy qurylǵan komısıa jınalǵan upaılar boıynsha baǵdarlamaǵa qatysýshylardy irikteıdi. Olarǵa nekede bolǵan jyldar sany, balalarynyń bolýy, jumys tájirıbesi, mamandyǵy jáne qyzmet salasy áser etedi.

Ótinishterdi qabyldaý aıaqtalǵannan keıin qatysýshylardyń tizimi jasalyp, Otbasy bankine jiberiledi. Qatysýshylar bankte tólem qabiletin baǵalatyp, baspana tabýy kerek. Ony satyp alýǵa bank 10 mln teńge nesıe beredi. Eger múliktiń quny 10 mln teńgeden asatyn bolsa, úmitker aıyrmashylyqty óz qarajaty esebinen tóleı alady.