Búgin QR Prezıdenttigine kandıdat Qasym-Jomart Toqaev Respýblıkalyq qoǵamdyq shtabta «Ádiletti Qazaqstan: Bárimiz jáne árqaısymyz úshin. Qazir jáne árdaıym» atty saılaýaldy baǵdarlamasyn jarıalady. Onda kandıdat aýyl sharýashylyǵy salasynda 350 myńnan astam jańa jumys ornyn ashýǵa, kooperatıvterdi damytý úshin búdjetten 1 trıllıon teńgeden astam qarajat bólýge ýáde berdi.
«Aýyl sharýashylyǵy el ekonomıkasynyń jańa qozǵaýshy kúshine aınalady. Aldaǵy úsh jyl aýyldyq aımaqtardy barynsha damytýǵa arnalady. Aýyldaǵy turmystyń qaladaǵy sıaqty jaıly bolýyna kúsh salamyz. Igerilmeı bos jatqan jerlerdi memlekettiń menshigine qaıtarý jumystaryn tyń qarqynmen jalǵastyramyz», – dedi Halyqtyq koalısıanyń kandıdaty.
Sondaı-aq baǵdarlamada aýyldyq jerlerdi damytýdyń keshendi tujyrymdamasyn qabyldaý jáne elimizde aýyl sharýashylyǵy kooperatıvterin qurý josparlary kórinis tapty. Kandıdattyń aıtýynsha, jeke qosalqy sharýashylyqtardyń teń jartysyn sonyń quramyna kirgizý kózdelip otyr.
«Aýyl sharýashylyǵy salasynda 350 myńnan astam jańa jumys oryndary ashylady. Jalpy, kooperatıvterdi damytý úshin búdjetten 1 trıllıon teńgeden astam qarajat jumsalady. Sonyń arqasynda artyq deldaldan qutylyp, aýyl eńbekkerleriniń tabysyn edáýir arttyrýǵa múmkindik týady», – dedi Qasym-Jomart Toqaev.
Kandıdat sýarmaly eginshilikti damytý basty baǵytqa aınalyp, onyń jalpy kólemi eki ese artatynyn da alǵa tartty. Eń qymbat qazyna sanalatyn sýdy únemdeýge de erekshe mán beriletinin atap ótti.
«Sý únemdeıtin tehnologıany qoldanýǵa aıryqsha kóńil bólinedi. Biz uzyndyǵy 3,5 myń shaqyrym bolatyn sýarmaly kanaldardy qaıta jańǵyrtamyz. Sondaı-aq 25 bógen salynady. 16 sý qoımasyn kúrdeli jóndeýden ótkizemiz», – dedi kandıdat.
Sonymen qatar kandıdat elimizdiń 60 paıyzy gazben qamtamasyz etiletinin, al turǵyndardyń jaıly ómir súrýi úshin 7 jylda 111 mıllıon sharshy metr turǵyn úı paıdalanýǵa beriletinin jetkizdi.
«Qýatty óńirler – qýatty el» qaǵıdasy memlekettik saıasattyń basty baǵyty bolyp qala beredi. Óńirlik saıasat ádiletti bolsa, iri qalalardaǵy jáne shaǵyn aýyldardaǵy jurt jaıly ómir súredi. Elimizde aldaǵy 7 jylda 111 mıllıon sharshy metr turǵyn úı paıdalanýǵa beriledi. Úleskerlerdi tyǵyryqqa tiregen daýly úılerdiń qurylysy túgel aıaqtalady», – dedi Qasym-Jomart Toqaev.
Kandıdat 40 myńǵa jýyq apatty jáne tozyǵy jetken turǵyn úı ıeleri baspanaly bolatynyn atap ótti. Buǵan qosa, «7–20–25» ıpoteka baǵdarlamasy jalǵasyn tabady. Memleket jappaı turǵyn úı qurylysy júrip jatqan aýdandarǵa ınjenerlik komýnıkasıa jelisin tartý jumysy jalǵasady.
Qasym-Jomart Toqaevtyń aıtýynsha, elimizdiń barlyq eldi mekenderi sýmen jabdyqtalady. Al tozyǵy jetken komýnaldyq jeliler 40 paıyzǵa deıin tómendeıdi. Tas joldardyń sapaly salynýy jáne jóndelýi qamtamasyz etiledi. Respýblıkalyq mańyzy bar 8 myń shaqyrym, oblystyq jáne aýdandyq mańyzy bar 14 myń shaqyrym avtojoldar salynyp, qaıta jóndeledi.
Daıyndaǵan: Respýblıkalyq qoǵamdyq shtab
Astana qalasy, Qonaev k. 12/1
Tapsyrys berýshi: M. J. Ospanov
Prezıdenttikke kandıdat Q.K.Toqaev saılaý qorynyń qarajatynan tólendi
Pikir qaldyrý