Reseı AQSH-qa "Grom" strategıalyq ıadrolyq kúshter jattyǵýy bastalǵanyn resmı túrde habardar etti dep jazady svoboda.org basylymy. Pentagon men AQSH memlekettik departament ókilderiniń habarlaýynsha, Áskerı jattyǵý kezinde ıadrolyq oqtumsyq tasýǵa qaýqarly balıstıkalyq zymyrandar synalady. 

Mundaı áskerı jattyǵýlar jylda ótkizilgenimen, Ýkraına men Reseı soǵysy ótip jatqandyqtan oǵan bıyl erekshe nazar aýdarylyp otyr. 

"Reseı oqý-jattyǵý týraly habarlaý arqyly qarý-jaraqty baqylaý jónindegi mindettemelerin oryndap otyr", dedi Pentagon ókili Patrık Raıder.

"Mundaı eskertý jattyǵýdy burys baǵalaýdan saqtaıdy" dep esepteıdi AQSH memlekettik departament ókili Ned Praıs.

Mundaı áskerı jattyǵýlar buǵan deıin Reseı Ýkraınaǵa basyp kirerden birneshe kún buryn uıymdastyrylǵan. Alaıda sol kezde jattyǵýdyń ótetini habarlanbady. AQSH ókilderi Reseı jaǵynyń jattyǵý týraly eskertýin bir apta boıy kútken. 

Qazan aıynyń basynda NATO bas hatshysy Iens Stoltenberg Reseıde ótetin áskerı jattyǵýlardy jiti baqylaıtynyn habarlaǵan edi.