Qazir álem ashyq aqparat maıdanyna kóshkendikten, mádenıetter men órkenıetter «qaqtyǵysy» kún saıyn sanany synalap jaýlaýda. Bul ásirese adamdardyń senimine shabýyldap, rýhanıatyn laılap úlgergenin elimizdegi jat dinı aǵymdardyń lańynan belgili tájirıbege aınaldy. Osy oraıda dinı sala qyzmetkerleriniń jat aǵymdardy aýyzdyqtaýǵa pármeni qanshalyqty degen saýal týyndaıdy. Sondyqtan elimizdegi jalǵyz ıslamı joǵary bilim ordasy Nur-Múbarak ýnıversıteti janynan «Ekstremızmniń aldyn alýǵa baılanysty mamandardy qaıta daıarlaý ınstıtýty» bolyp ashylǵan ortalyq jaqynda «Dinı ekstremızmge qarsy is-qımyl akademıasy» bolyp qaıta qurylǵan. Akademıa dinı ońaltý jáne eksremızmge qarsy sala boıynsha negizgi áriptester Qazaqstan Respýblıkasynyń Aqparat jáne qoǵamdyq damý mınıstrliginiń  Din isteri komıteti, ákimdikter, aımaqtyq dinı zertteý ortalyqtary jáne Qazaqstan musylmandary dinı basqarmasy ekenin aıtady.  

Osy aptada QMDB mamandaryna arnalǵan «Dinı ońaltý jumystaryn júrgizýdiń tıimdi tásilderi» atty kýrs bastaldy. 

"Ekstremızmniń aldyn alý baǵyttary boıynsha bizde turaqty jobalar, kýrstar jyl boıy jalǵasyp otyrady. Sonyń biregeıi QR AQDM Din isteri komıtetimen úshinshi jyl qatarynan «Islamdyq baǵyttaǵy destrýktıvti jáne radıkaldy dinı ıdeologıany ustanýshylardy radıkaldy kózqarastan aryltý jáne ońaltý salasyndaǵy mamandardyń biliktiligin arttyrý» atty kýrs óte joǵary deńgeıde ótti. Sońǵy ret elimizdiń túkpir-túkpirinen dinı salaǵa tikeleı qatysy bar 73 maman, ıaǵnı teologtar, ıslamtanýshylar, ımamdar, dintanýshylar jan-jaqty bilimderin jetildirdi. Al qazir Qazaqstan musylmandary dinı basqarmasynyń mamandary biliktiligin arttyrý ústinde", – dedi akademıa dırektory, teolog Tımýr Núsiphanuly:

Sondaı-aq sońǵy 2 jylda QMDB, aımaqtyq jáne qalalardaǵy din isteri basqarmalary, olarǵa qarasty ortalyqtar, jalpy 700-den asa maman qamtyǵan 9 kýrs uıymdastyrylǵan. «Jýsan» gýmanıtarlyq operasıasymen qaıtarylǵan jáne destrýktıvti dinı aǵym jetegindegilerdi ońaltý maqsatynda elimizdiń ár aımaǵynan 200-deı adamǵa kýrstar ótken. Tek bul baǵytta ǵana emes, BAQ, áleýmettik jelilerde destrýktıvti sanaǵa nasıhattaýshy sheteldik ýaǵyzshylardyń 15 beınejazbasyna saraptama jasalyp, naqty jaýap berildi. Respýblıkalyq «Jetisý» telearnasymen birlesken «Búgingi din» telehabarynda ulttyq qundylyqtarymyzdy dáripteý, deradıkalızasıa boıynsha ózekti taqyryptarǵa 22 habar kórermenge usynylǵan. Demek elimizdegi dinı turaqtylyq jolynda biliktiligi myǵym mamandar artyp qana qoımaı, eldiń dinı saýaty da kóterilip keledi degen senimdemiz.

Nur Múbarak Egıpet ıslam mádenıeti
ýnıversıtetiniń baspasóz qyzmeti