Búginde eki úıdiń biriniń balasy túrli-tústi kıimdegi Chıkı, Cha-CHa, Bým-Bým, LáLá atty keıipkerlerdi biledi desek, artyq aıtqandyq bolmas. Olardyń yrǵaqty ánderiniń qaralymy birneshe mıllıardtan asyp ketken. Kóńildi tórttiktegi keı jigitterdiń júzi ásirese qazaq aýdıtorıasyna tanys sıaqty kórinýi múmkin. Óıtkeni balalar kontentimen álemdi baǵyndyryp jatqan shyǵarmashylyq ujym qyrǵyz eliniń ókilderi. 28 qazan – halyqaralyq anımasıa kúninde mıllıondaǵan baldyrǵan kúnde kóretin kóńildi vıdeolardyń avtory D Billions komandasy týraly aqparat usynamyz.

D Billions – balalar ánderin oryndaıtyn mýzykalyq top. Komandanyń negizin salýshy Ernıs Úmetalıev esimdi qyrǵyz mýzykanty. Mýzykalyq toptyń qyrǵyz, aǵylshyn, orys, ıspan, fransýz, portýgal, arab, ındonezıa sıaqty segiz tilde kontent taratatyn on YouTube arnasy bar. Negizgi D Billions dep atalatyn arnanyń jazylýshylary búginde 22 mıllıonǵa taıap qalǵan. Al kanaldaǵy jalpy qaralym 25 mıllıardqa jýyqtaıdy.

D Billions brıllıant batyrmaǵa ıe Orta Azıadaǵy jalǵyz Youtube kanal. Al vıdeolardaǵy ánder Spotify, Amazon, iTunes, Apple Music, Deezer, Yandex, Mýzyka, Vkontakte sekildi án satyp alý platformalaryna júktelip otyrady.

D Billions jas kórermendi ánderindegi kóńildi motıvpen, balalar aýdıtorıasyna beıimdelgen qarapaıym mátindermen jaýlap aldy. Keıipkerleri alfavıt áripteri týraly aıtady, aǵylshyn sózderin úıretedi, búldirshinderge qaıtalaý ońaı bı qımyldaryn kórsetedi. Keıipkerlerdiń obrazy jarqyn, tús úılesimine, tústiń vızýal yqpalyna qatty mán berilgen.

Top tanymaldyqqa ıe bola bastaǵanda olardyń kim ekenin bilgisi keletinder sany kóbeıdi. Olardyń biri fılıpındikterge, biri qytaılarǵa, endi biri orta azıalyqtarǵa uqsatyp jatty.

Tek 2021 jyldyń aqpanynda arnaǵa qyrǵyz tilinde birneshe beınerolıkter shyǵarylǵannan keıin D Billions qatysýshylary jas qyrǵyzstandyqtar ekeni týraly aqparat shyqty.

Top quramy Chıkı (Chicks), Cha-CHa (Cha-Cha), Bým-Bým (Boom-Boom) jáne Lálá (LyaLya) búrkenshik attarymen óner kórsetetin 4 adamnan turady. Chıkı esimdi saryshashty keıipker áleýmettik jelide Saree Shake degen nıkpen belgili. Vıdeolardy áleýmettik jelide ilgeriletýmen aınalysady. Cha-CHa dep atalatyn kók shashty keıipkerdiń rólin tanymal qyrǵyz mýzykanty Asko Anarqulov oınaıdy. Qyzyl shashty Bým-Býmnyń rólin Johnny degen sahnalyq esimmen tanymal taǵy bir mýzykant Jánibek Jeńisbekov somdaıdy. Lılıdiń rólindegi akter qyzdyń esimi Darına Vekýa.

Komandanyń negizin salýshy 15 jyldan astam ýaqyt qyrǵyz shoý bıznesinde eńbek etken mýzykant Ernıs Úmetalıev. Ol VVS-diń qyrǵyz qyzmetine bergen suhbatynda elde shoý bızneske qaraǵanda, toı bıznes keń etek jaıǵanyn, toıdan sharshap, basqa nársemen aınalysqysy kelgenin aıtady. Óner arqyly Qyrǵyzstan atyn shyǵarýdy armandaǵanyn atap ótedi. Sóıtip júrgende qyrǵyz elinde Youtube kóp qarala bastap, sol jaqta baǵyn synap kórgen. Alaıda Youtube-ta avtorlyq kontentter ǵana shyǵatyndyqtan, ári solarǵa ǵana aqsha tólenetindikten, shyǵarmashylyq ujymǵa kóp izdenýge týra kelgen. Aqyry balalar kontentine kelip toqtap, birtindep vıdeo túsirip, tarata bastaǵan. Alǵashqyda áleýmettik jeli zańdylyqtaryn bilmegendikten Youtube vıdeolardy buǵattap, óshirip tastap otyrǵan. İzdenip, strategıa quryp, marketıń jasap, vıdeolardy taratý tásilderin meńgergen soń balalar kontenti óz aýdıtorıasyn tapqan.

Ernıs Úmetalıev D Billions-tyń jetistik syryn bilikti komandamen baılanystyrady. Vıdeoda tórt keıipker ǵana kóringenimen, onyń artynda tutas ujym eńbegi jatyr. Daıyn vıdeo jıyrma kúnge sozylatyn úlken prosesten turady. Aldymen án jazylyp, soǵan senarı qurylady. Kelesi kezeńde ónimmen qoıýshy rejıserler jumys istep, anımasıa bólimine tapsyrady. Anımasıa daıyn bolǵan soń, qaıtadan dybys jazylady. Osylaısha aıyna 15-20 rolık daıyndalady. Komanda sanǵa emes, sapaǵa jumys istegen durys deıdi. Trend sońynan qýǵansha, óziń trend bolatyn dúnıe jasa degen de Ernıs Úmetalıev ustanǵan bas qaǵıdalardyń biri.

Ernıs Úmetalıev rolıkterdi jasaýda áleýmettik jaýapkershilikti eskere otyryp vıdeo bala úshin tanymdyq bolýyna basa mán beretinin aıtady. Bul talpynys sátsiz emes. Mıllıondaǵan balanyń ana-anasy búldirshini sandardy, áripterdi, aǵylshyn sózderin úırenip jatqanyn komentarııge jazyp, jyly pikirlerin qaldyrǵan.

Komanda qyrǵyz elementteri bar vıdeolardy aǵylshyn tilinde usynyp, sol arqyly el ımıjine oń yqpal etýdi de josparlaıdy.

D Billions munymen toqtap qalmaı, aldaǵy ýaqytta 50 mıllıon, 100 mıllıon jazylýshylarǵa qol jetkizýge nıetti.