Qusqa arnalǵan quramynda aqýyz mólsheri joǵary jem-shóp tapshylyǵy Qazaqstanda qus sharýashylyǵy ónimderiniń qymbattaýyna ákep soǵýy múmkin. Bul týraly atameken kásipkerler palatasynyń resmı saıty habarlady.

Kásipkerlerdiń aıtýynsha, bul jaǵdaı qyrkúıekten bastalyp, temirjol kóligimen kúnjara, jom tasymaldaýǵa arnalǵan vagondardyń bolmaýyna baılanysty tipti túıtkildi problemaǵa aınalǵan. Qazirgi kezde qus sharýashylyǵyn azyqpen qamtamasyz etý jáne ósimdik maıyn ishki tasymaldaý úshin aıyna 300-ge jýyq vagon qajet.

«Kásiporyndar tarapynan ótinimder ýaqytyly berilgenine qaramastan, «Qaztemirtrans» AQ jem-shópti tıeýge jabyq vagondardy bermeı jatyr. QTJ tarapynan da keste josparlanbady nemese vagondardyń az ǵana sanyna ruqsat beriledi. Sonyń saldarynan kásipkerler jospardy oryndaı almaı, aıyppul tóleýge májbúr bolady», – dep atap ótti Qazaqstannyń maıly daqyldardy qaıta óńdeýshiler ulttyq qaýymdastyǵynyń basqarma tóraǵasy Iadykar Ibragımov onlaın kezdesýde.

Kásipkerler jetkizý kestesiniń buzylýy kúnjara men jomnyń ǵana emes, sonymen qatar bótelkedegi kúnbaǵys maıynyń da tapshylyǵyn týdyratynyn jetkizdi. Olardyń aıtýynsha, bul jaǵdaı kóptegen áleýmettik mańyzy bar azyq-túlik ónimderiniń baǵasyna áser etýi múmkin.

Máseleni sheshý úshin «Qaztemirtrans» AQ tasymaldaýdy qamtamasyz etý departamentiniń dırektory Nurlan Esembaev kásipkerlerge kólemi 64-66 tonna vagondarǵa ótinim berýdi usynǵan.

 «Jomnyń salmaǵy aýyr, sondyqtan tapsyrystarda 68 tonna kórsetiledi. Osyǵan baılanysty bos turǵan 64-66 tonnnalyq vagonadardy paıdalanaıyq. Osylaısha másele tezirek sheshiledi. Alaıda vagonnyń bárinde birdeı joǵarydan tıeıtin lúkteri bola bermeıdi. Mysaly 3 vagonǵa jemdi tógip tıeýge bolsa, 4 vagonda qappen tıeýge týra keledi»,– dedi spıker.