Abaı atyndaǵy Qazaq ulttyq pedagogıkalyq ýnıversıtetinde Almaty qalasy ákimdigi, Qoǵamdyq damý basqarmasy «Qoǵamdyq kelisim» mekemesi jáne ýnıversıtettik «Rýhanı jańǵyrý» jobalyq keńsesiniń uıymdastyrýymen «Etnosaralyq kelisimniń qazaqstandyq modeli» taqyrybynda semınar ótti. 

Semınardyń negizgi mindeti – qoǵamdyq kelisim men jalpyulttyq birlikti, etnosaralyq qarym-qatynas jasaı otyryp, rýhanı qundylyǵymyz bolǵan, memlekettik tildi nyǵaıtý salasynda jastar arasynda aqparattyq túsindirý jumystaryn júzege asyrý bolyp tabylady. 

Semınarǵa Abaı atyndaǵy QazUPÝ-nyń Áleýmettik damý jónindegi prorektory Shyńǵys Nurlanuly, «Irnyhas» osetın mádenı-aǵartý ortalyǵynyń tóraǵasy, Qazaqstan halyqtary Assambleıasynyń múshesi, etnosaralyq qatynastar máseleleri jónindegi aqparattyq-túsindirý tobynyń múshesi, qoǵam qaıratkeri Qazbek Mamsýrov, Álemdik ekonomıka jáne halyqaralyq qatynastar ınstıtýtynyń dırektory, ekonomıka ǵylymdarynyń doktory, Almaty qalasynyń Qoǵamdyq kelisiminiń múshesi, Respýblıkalyq uıǵyrlar birlestiginiń jetekshisi Akımjan Arýpov, T.K.Júrgenov atyndaǵy QazUÓA «Qazaqstan tarıh pen áleýmettik ǵylymdar» kafedrasynyń oqytýshysy, zań magıstri Qanatbek Erǵazyuly, fılologıa ǵylymdarynyń kandıdaty, dosent, Qazaqstan halqy Assambleıa kafedrasynyń meńgerýshisi Gúljıhan Pishenbaıqyzy, ýnıversıtettik «Birlik» stýdenttik assambleıasynyń stýdentteri, ınstıtýttardyń dırektorat ókilderi jáne profesor oqytýshylar quramy men stýdentter qatysty. 

Spıkerler men qonaqtar stýdentterge elimizdegi etnosaralyq mádenıetti qalyptastyrý negizderi men onyń modeli, kópultty memleket bolýymyzdyń mańyzdylyǵy týraly óz oılaryn ortaǵa saldy. 

«Abaı atyndaǵy Qazaq ulttyq pedagogıkalyq ýnıversıteti kóptegen jumystar atqarýda. Oqý ornymyzda Qazaqstan halqy Assambleıasy kafedrasy men «Birlik» stýdentter assambleıasy jumys isteıdi. Olar óz jumys jospary boıynsha qoǵamnyń odan ary birigýi, etnokonfessıonaldyq qatynastardy úılestirý, etnosaralyq kelisimdi nyǵaıtý, etnosaıası baǵyttaǵy oqý-tárbıe jáne ǵylymı-zertteý jumystaryn úılestirý, qoǵamdyq kelisimniń qazaqstandyq modelin nasıhattaýdyń biryńǵaı ádisnamalyq jáne praktıkalyq joldaryn usyný baǵytynda kúsh jumyldyrady», - dedi prorektor Shyńǵys Nurlanuly.